ኢትዮጵያ

የኢትዮጵያውያን እና የዳያስፖራ ባለሃብቶች የኢንቨስትመንት ፎረም በዋሽንግተን ዲሲ ተካሄደ

የኢትዮጵያውያን እና የዳያስፖራ ባለሃብቶች የኢንቨስትመንት ፎረም በዋሽንግተን ዲሲ ተካሄደ

አዲስ ሚዲያ ኔትዎርክ(ኤ ኤም ኤን) ሚያዚያ 7/2015 ዓ.ም
በኢትዮጵያ በተለያዩ የኢንቨስትመንት ዘርፎች የተሰማሩ ባለሃብቶች እና ነዋሪነታቸውን በአሜሪካ ያደረጉ ኢትዮጵያውያን የዳያስፖራ ባለሃብቶች የኢንቨስትመንት ፎረም በዋሽንግተን ዲሲ የኢትዮጵያ ኤምባሲ ተካሄደ።

ፎረም መክፈቻ ላይ የኢፌዴሪ የገንዘብ ሚኒስትር አቶ አህመድ ሺዴ እንደገለጹት ኢትዮጵያ ያላትን እምቅ የኢንቨስትመንት አማራጮች በመጠቀም በአገር ውስጥም ሆነ በውጭ የሚኖሩ ኢትዮጵያውያን ከመቼውም ጊዜ በላይ በተለያዩ የኢንቨስትመንት ዘርፎች ተሰማርተው እንዲሰሩ መንግስት አስፈላጊውን ድጋፍ ያደርጋል።

በኢትዮጵያው የተጀመረው ዘላቂ ሰላም የማስፈን ሂደት እንዳይቀለበስ በሙሉ ቁርጠኝነት እየተሰራ መሆኑንም ተናግረዋል።

በትግበራ ላይ የሚገኘው አገር በቀል የኢኮኖሚ ማሻሻያ የግሉ ዘርፍ ጉልህ ሚና እንዲጫወት የሚያስችል መሆኑን ጠቅሰው መንግስት አስቻይ የፖሊሲ ማዕቀፎችን በመዘርጋትና ውስን በሆኑ የኢንቨስትመንት መስኮች ብቻ ይሳተፋል ብለዋል።

በተለይም አሜሪካን ጨምሮ በተለያዩ ሀገራት የሚኖሩ ኢትዮጵያውያን ዳያስፖራ ባለሃብቶች ያካበቱትን ሀብት፣ ልምድ እና እውቀት ወደ አገራቸው ይዘው በመግባት በግል እና ከአገር ውስጥ ባለሃብቶች ጋር በመሆን እንዲሰሩ ጥሪ አቅርበዋል።

ኢንቨስትመንትን ለማበረታታት ባንኮች የሚሰጡት ብድር ዘጠና በመቶ የሚሆነው ለግል ዘርፉ ተደራሽ እየተደረገ መሆኑን ደግሞ የኢትዮጵያ ብሔራዊ ባንክ ዋና ገዥ አቶ ማሞ ምህረቱ አስታውቀዋል።

በአሜሪካ የኢፌዴሪ ልዩ መልዕክተኛና ባለሙሉ ስልጣን አምባሳደር ስለሺ በቀለ “በአሜሪካ የሚኖሩ ኢትዮጵያውያን እና ትውልድ ኢትዮጵያውያን በሀገር ልማት፣ በገጽታ ግንባታ፣ በንግድና ኢንቨስትመንት፣ በትምህርት፣ በጤና እና በሌሎች ዘርፎች የሚኖራቸውን ተሳትፎ ለማሳደግና ከአገራቸው ጋር ያላቸውን ትስስር ለማጠናከር ከፍተኛ ትኩረት ተሰጥቶ እየተሰራ ነው” ብለዋል፡፡

በግልም ሆነ በጋራ በመሆን በኢትዮጵያ በቢዝነስና ኢንቨስትመንት ዘርፎች ለመሰማራት ፍላጎት ላላቸው ባለሃብቶች ኤምባሲው በአገር ቤት ከውጭ ጉዳይ ሚኒስቴር፣ ከኢትዮጵያ ኢንቨስትመንት ኮሚሽን እና ከሌሎች ከሚመለከታቸው ተቋማት ጋር በመቀናጀት አስፈላጊውን ድጋፍ እንደሚያደርግ ገልጸዋል።

የኢትዮጵያ ኢንቨስትመንት ኮሚሽን ኮሚሽነር ሌሊሴ ነሜ በበኩላቸው ኢትዮጵያ ለኢንቨስትሮች ምቹ እንደትሆን ተግባራዊ የፖሊሲ ማሻሻያዎች እንደተደረጉ ተናግረዋል።

ባለሃብቶች ከገበያ ዳሰሳ ጥናት፣ ከፈቃድ ማውጣት፣ በስራ ላይ እና ከዛም አልፎ የሚገጥሟቸውን የቢሮክራሲ እና ተያያዥ መሰናክሎች በፍጥነት እልባት እንዲያገኙ እየተደረገ መሆኑን ለአብነት ጠቅሰዋል።

የተለያዩ አገራት ባለሃብቶችን ወደ አገራችን ለመሳብ እና መረጃዎችን በተገቢው መንገድ ለማሰራጨት ኮሚሽኑ ከኢትዮጵያ ሚሲዮኖች ጋር በቅርበት እየሰራ እንደሚገኝም ተናግረዋል።

በተሳታፊዎች በኩልም ጥያቄዎች እና አስተያየቶች ቀርበው ምላሽ መሰጠቱን ዋሽንግተን ከሚገኘው የኢትዮጵያ ኤምባሲ የተገኘ መረጃ ያመለክታል።

ተመሳሳይ ልጥፎች

የገጠር መንገድ ተደራሽነትን በማስፋት የምግብ ዋስትናን ለማረጋገጥ የሚያስችል ፕሮጀክት ይፋ ሆነ

admin

በመጪዎቹ ሁለት ዓመታት በተልዕኮና ትኩረት መስካቸው የተለዩ 9 ዩኒቨርስቲዎችን ወደ ራስ ገዝ ደረጃ ለማሻገር እየተሰራ ነው: – የትምህርት ሚኒስቴር

admin

ኢትዮጵያ ንግድ ባንክ በቢክ ኢትዮጵያ የተዘጋጀውን ውድድር አሸነፈ።

admin

አስተያየት ይስጡ