AMN – ጥቅምት 11/2017 ዓ.ም
የኢንዱስትሪ ፓርኮች ልማት ኮርፖሬሽን ከ2 ነጥብ 6 ቢሊዮን ብር በላይ ኢንቨስትመንት በቦሌ ለሚ ኢንዱስትሪ ፓርክ የኤሌክትሪክ መኪኖችንና ዘመናዊ የቢሮ እቃዎችን ከሚያመርቱ አንዳ ቨሂክል ማኑፋክቸሪንግ እና አንይ ፈርኒቸር ፒኤልሲ ከተባለ የቻይና ኩባንያ ጋር የውል ስምምነት ተፈራርሟል፡፡
የውል ስምምነቱን የኮርፖሬሽኑ ዋና ስራ አስፈጻሚ ፍሰሃ ይታገሱ (ዶ/ር) እና የአንዳ ቨሂክል እና አንይ ፈርኒቸር ፒኤልሲ ስራ አስፈጻሚ ው ሃንግሹ ጋር ተፈራርመዋል፡፡
የተለያዩ የኤሌክትሪክ መኪናዎችን፤የኤሌክትሪክ ሞተር ሳይክሎችንና ዘመናዊ የቢሮ እቃዎችን የሚያመርተው ኩባንያው ምርቶቹንም ለሃገር ውስጥና ለውጭ ገበያ የሚያቀርብ ይሆናል፡፡
ኩባንያው በቦሌ ለሚ ኢንዱስትሪ ፓርክ ውስጥ 2 ሄክታር የለማ መሬት ከኮርፖሬሽኑ በመረከብ ወደ ስራ የሚገባ መሆኑ የተገለጸ ሲሆን በሙሉ አቅሙ ወደ ስራ ሲገባም ለበርካታ ዜጎች የስራ እድልን ይፈጥራል ተብሏል፡፡
የኢንዱስትሪ ፓርኮች ልማት ኮርፖሬሽን በሚያስተዳድራቸው 13 ኢንዱስትሪ ፓርኮችና የድሬዳዋ ነጻ የንግድ ቀጠና ከ140 በላይ የሃገር ውስጥና የውጭ ባለሃብቶቸ በተለያዩ ኢንቨስትመንት ዘርፎች ላይ ተሰማርተው እንደሚገኙ የኮርፖሬሽኑ መረጃ ያሳያል፡፡
የቻይናውያን ባለሃብቶች ተሳትፎም ከፍተኛውን ድርሻ እንደሚይዝ ተመላክቷል፡፡
