AMN PLUS – Bitootessa 16/2018
Biiroon Bulchiinsa Nageenyaafi Tasgabbii Magaalaa Finfinnee sirna boba’aa seeraan qusatan fayyadamuu irratti guyyoota 15 darban hordoffii taasiseen boba’aan seeraan ala daddabarfamaa ture Liitirri Kuma 58 ol to’annoo jala oolfamuu danda’uu beeksiseera.
Koreen hordoffiifi to’annoo kabachiisa seeraa hojiilee baatiiwwan 4’n darban hojjechaa ture qorateera.
Hooggantuun Biiroo Bulchiinsa Nageenyaafi Tasgabbii Magaalaa Finfinnee Aadde Liidiyaa Girmaa magaalattiitti sirna daldalaa ammaayyaa diriirsuun hojiin olaantummaa seeraa kabachiisuu hojjetamaa jiraachuu ibsaniiru.
Baatiiwwan 4’n darban keessa hojiilee hordoffii taasifamaniin bu’aan qabatamaan galmaa’uu kan ibsan Aadde Liidiyaan kanaanis zaayitniifi sukkaarri seeraan ala kuufame hedduun to’atamuu ibsaniiru.
Daballii gatii hin mallee kanneen taasisan, eeyyama daldalaa malee warreen hojjetaniifi daldala seeraan alaatti kanneen bobba’aan lakkoofsaan daldaltootni Kuma 10 caalan hordoffii taasifameen to’annoo jala oolfamuun tarkaanfiin bulchiinsaafi seeraa irratti fudhatamuunis ibsameera.
Finfinneetti sirna boba’aa seeraan qusatan fayyadamuu irratti guyyoota 15 darban hordoffii taasifameen boba’aan seeraan ala daddabarfamaa ture Liitirri Kuma 58 ol to’annoo jala kan oolfame yoo tahu gocha daldala seeraan alaa kanaan wal qabatee kanneen shakkaman namootni dhuunfaa 35 to’atamuun seeraaf dhiyaachuun ibsameera.
Gabaasa Teewudroos Isaah Iddoosaa Abdiitii qindeesse
