AMN PLUS – Ebla 19 /2018
Itoophiyaan jijjiirama qilleensaa hir’isuu giddu-galeessa godhachuun imala bu’a qabeessa ta’e irra jirti jedhan Ministirri Maallaqaa Obbo Ahimad Shidee.
Fandii Invastimantii Haala Qilleensaa mootummaa Itoophiyaa fi Baankii Misooma Afrikaa waliin ta’uun Finfinneetti muuxannoo waljijjiirraa Idil-Addunyaa gaggeeffamuu eegaleera.
Konfiraansii kana irratti ambaasaaddaroonniifi bakka bu’oonni biyyoota garaagaraa, barsiisotni, michootni misoomaafi dhaabbileen hawaasa siivikii hirmaataniiru.
Konfiraansii guyyoota sadiif turu kanarratti biyyoonni adda addaa jijjiirama qilleensaa ittisuuf muuxannoo qaban ni qoodu jedhameera.
Konfiraansicharratti Obbo Ahimad Shidee yeroo walfakkaatutti mul’anni fi kallattiin misoomaa Itoophiyaa jijjiirama qilleensaa salphisuu irratti kan xiyyeeffate ta’uu ibsaniiru.
Kanaafis anniisaa haaromfamuu danda’u babal’isuun, dhiyeessii bishaanii fooyyessuudhaan, lafa manca’e deebisuun dandamachiisuurratti hubannoo hawaasaa guddisuuf hojiiwwan bu’a qabeeyyiin hojjetamuu ibsaniiru.
Pirojektoonni misooma koridoorii Finfinnee fi misooma qarqara lagaa magaalattii ammayyeessuu qofa osoo hin taane, misoomni haala eegumsa naannoo waliin walsimuun gaggeeffamuu akka danda’u kan agarsiisan ta’uu ENA gabaaseera.
Hojii Gaggeessaan Fandii Invastimantii Haala Qilleensaa Obbo Tariyee Baadigeesiin akka jedhanitti, Itoophiyaan biqiltuuwwan biliyoonaan lakkaa’aman dhaabuun magariisa gochuu keessatti fakkeenya ta’uu ishee ibsaniiru.
