AMN PLUS -Waxabajjii 22/2018
Sadarkaa Magaalaa Finfinneetti barattoota qormaata kutaa 8ffaa fudhatan Kuma 85 fi 737 keessaa 95.85 % gara kutaa itti aanuutti darbuun ibsameera.
Hogganaan Biiroo Barnootaa Magaalaa Finfinnee Zalaalem Mulaatuu (PhD) bu’aan qormaata kutaa 8ffaa ifoomuu ibsuun barattoota qormaaticha fudhatan keessaa dhibbeentaan 95.85 gara kutaa 9ffaatti darbuu ibsaniiru.
Dooktar Zalaalem ibsa isaaniitiin barattoota qormaata kutaa 8ffaa fudhatan Kuma 85 fi 737 keessaa barattootni Kuma 82 fi 193 dhibbeentaa 50 fi isaa ol fiduun darbaniiru.
Barattoontni 60’n qabxii 93.5 ol yoo fidan barattootni 131 ammoo 90 ol galmeessuu Dooktar Zalaalem ibsaniiru.
Qabxiin darbinsaa 50 fi isaa ol akka ta’eefi warreen qaama miidhamtootaaf ammoo 45 fi isaa ol ta’uu hoggantichi ibsaniiru.
Manneen barnootaa 669 qormaaticha qorsiisan keessaa manneen barnootaa 441 dhibbeentaa dhibba (100%) barattoota isaanii gara kutaa itti aanuutti dabarsuu ibsaniiru.
Hogganaan Biiroo Barnootaa Magaalaa Finfinnee Zalaalem Mulaatuu (PhD) Bulchiinsi Magaalichaa barnootaaf xiyyeeffannoo kennuun hojjechaa turuu ibsuun kunis bu’aa olaanaa galmeessuu hubachiisaniiru.
Gabaasni kan Bayyanaa Taaddasaati
