AMN PLUS-Adoolosse 10/208
Tajaajilli balallii Daandiin Qilleensaa Itoophiyaa kallattiin gara Moorishiyesitti taasisu dinagdee ardii akka saffisiisu Pirezidaantiin Moorishiyes Daahrambir Gookul ibsan.
Tajaajilli balalii kallattii kunis carraa turizimii, daldalaa, invastimantii, fi misooma humna namaa kan babal’isu ta’uu isaa dubbataniiru.
Daandiin Qilleensaa Itoophiyaa torbanitti al sadii tajaajila geejjiba imaltootaa kallattiin Finfinnee fi buufata Luwiis gidduutti Adoolessa 5 bara 2018 ifatti eegaluu isaa beeksiseera.
Pirezidaantiin Moorishiyes Daarambir Gookul balaliin kallattii kun walitti hidhamiinsa daandii qilleensaa cimsuun dandeettii dinagdee Afrikaa guddisuuf murteessaadha jedhaniiru.
Finfinnee fi buufata Luwiis gidduutti balaliin kallattiin eegaluun isaa mul’ata Gamtaan Afrikaa dinagdee ardii saffisiisuuf qabu galmaan ga’uuf gumaacha olaanaa akka qabus ibsaniiru.
Itoophiyaanis damee aviyeeshiniitiin dinagdee Afrikaa saffisiisuuf tarkaanfiiwwan ijoo fi qabatamaa fudhachaa jirtu kunis ergaa cimaa kan dabarsu ta’uu akeekaniiru.
Tajaajilli balallii Daandii Qilleensaa Itoophiyaa fi Moorishiyaa giddutti eegale kunis walitti dhufeenya seena qabeessa biyyoota lamaanii daran cimsuu fi tumsa dinagdee ni guddisas jedhaniiru.
Moorishiyes invastarootaa fi dhaabbilee daldalaa idil-addunyaatiif karra Afrikaa ta’uuf hojjechaa waan jirtuuf, walitti hidhamiinsa daandii qilleensaa cimaa misoomsuun faayidaa guddaa qabas jedhaniiru.
Daandiin Qilleensaa Itoophiyaa Afrikaa fi addunyaatti balallii bal’aa taasisuun sochii daldalaa fi invastimantii biyyoota gidduu jiru haalaan dabaluu fi rakkoo loojistikii salphisuuf hojjechaa akka jirus eeraniiru.
Tajaajila aviyeeshinii bira darbee Daandiin Qilleensaa Itoophiyaa balaliistotaa fi ogeessota aviyeeshinii biroo leenjisuun sadarkaa idil-addunyaatti maqaa gaarii qabaachuun isaa lammiilee Moorishiyeesiitiif carraa guddaa kan uumu akka ta’es pirezidaantiin kun ibsaniiru.
Itti dabaluunis damee barnootaa, fayyaa, fi dameewwan biroo irratti tumsi beekumsa, teeknooloojii,fi muuxannoo wal jijjiiruun ummattoota isaanii fayyadamoo taasisu bal’aan akka jiru ibsuu isaanii ENA’n gabaaseera.
