AMN PLUS – Hagayya 12/2018
Itoophiyaan madda buna Arabikaafi qabeenya uumamaatiin badhaatuudha.
Bunni biyyattii magariisaa taate keessaa kan maddu, dhandhamaa fi urgaa isaa qofaan osoo hin taane, seenaa fi hambaa dhalootaa dhalootatti darbe, qabeenya aadaa ajaa’ibaa ta’eedha.
Itoophiyaaf bunni dhugaatii guyyaa guyyaa qofa miti lammiilee miliyoona 15 ol ta’aniif madda jireenyaa, akkasumas madda galii alaa biyyattii keessaa isa ijoodha.
Oomishtoota gadii irraa kaasee hanga al-ergitootaa fi warra buna qopheessanii dhiyeessanitti,namoota miliyoonaan lakkaa’aman carraa hojiifi galiidhaan walitti hidha.
Buna waliin dhuguun walitti dhufeenya hawaasummaa uuma. Sirni bunaa aadaa araaraa, gorsa, gammachuu fi gadda waliin qooddachuuf waltajjii jireenyaa ta’eera.
Itoophiyaan qabeenya hambaa garaagaraatiin kan badhaate ta’uu bira darbitee, iddoowwan hawwata turistii hedduu sadarkaa addunyaatti galmeessisuu kan dandeessedha.
Kennaa uumamaa ajaa’iba ta’eefi sirni aadaa buna qopheessuu dhalootaa dhalootatti darbu, UNESCO’ tti akka galmaa’u, akkasumas beekamtii biyya keessaafi idil-addunyaa akka argatuuf, Abbaan Taayitaa Bunaafi Shaayii Itoophiyaa qaamolee dhimmi ilaallatu waliin ta’uun odeeffannoo walitti qabuufi hojiiwwan qophii barbaachisan hojjechaa jiraachuun ibsameera.
Kunis, bunni kennaa Itoophiyaan addunyaaf gumaachite keessaa isa duraa ta’uu isaa irra deebiin kan mirkaneessuudha.
Itoophiyaa keessatti bunni gaaddisa bosona uumamaa jalatti waan guddatuuf, bosonni akka hin mancaane gochuuf gahee guddaa qaba.
Eegumsi biqiltuu bunaa,eegumsa bosonaati, eegumsi bosonaa immoo madaallii qilleensa addunyaa eeguudha.
Kanaaf, yeroo bunni Itoophiyaa tokko danfu, seenaa, aadaa, eegumsa uumamaafi jaalala ilma namaa hundatu finjaala bunaa tokko keessatti dhiyaata.
Gabaasa Taammiraat Bishaawu, Daraartuu Tarreessaati qindeesse
