AMN PLUS – Hagayya 28/2018
Ministirri Muummee FDRI Abiyyi Ahimad (PhD) waliigaltee seena qabeessa faayinaansii liqaa addaa bittaa mana jireenyaaf oolu qindeessuufi maallaqaan deeggaruuf dandeessisu Baankii Biyyaalessaa Itoophiyaa fi Dhaabbata Faayinaansii Idil-Addunyaa (IFC) gidduutti har’a mallatteessuu ibsaniiru.
Dooktar Abiyyi ergaa toora miidiyaa hawaasaa isaaniin dabarsaniin Dhaabbatichi kaappitaala Birrii Itoophiyaa Biliyoona 100’n kan hundaa’e yoo ta’u, Dhaabbanni Faayinaansii Idil-Addunyaa (IFC) ammoo gumaacha hanga Doolaara Ameerikaa Miliyoona 200 ga’u ni taasisa jedhaniiru.
Dhaabbatichi damee baankii keessatti rakkoo maallaqa callaa walqixaa argachuu dhabuu furuun, guutuu Itoophiyaa keessatti tajaajilli faayinaansii liqaa mana jireenyaaf oolu bal’inaan akka argamu kan taasisu ta’uunis ibsameera.
Tumsi kun manneen jireenyaa gatii madaalawaan ijaaraman, akkasumas kabaja lammiilee Itoophiyaa bifa eeganiin Miliyoona 1.5 dhiyeessuuf galma kaa’ame akkasumas sirna faayinaansii biyyatti keessatti hirmaannaa damee dhuunfaa guddisuuf kaayyeffame galmaan ga’uuf tarkaanfii murteessaa tahus Dooktar Abiyyi ergaa isaaniin kaasaniiru.
Ministirri Muummee FDRI Abiyyi Ahimad (PhD) Itoophiyaan dinagdee saffisaa, cimaafi hunda hammate hojiitti hiikuu akka itti fuftus ibsaniiru.
