ምክትል ጠቅላይ ሚኒስትር አቶ ተመስገን ጥሩነህ በማህበራዊ ትስስር ገጻቸዉ ባሰፈሩት መልዕክት ሰላማዊ አማራጭን የተከተሉ፣ ሐሳባቸውን በጠረጴዛ ዙሪያ ለማቅረብ የፈቀዱ፣ የሠለጠነውን መንገድ ለመሞከር የቆረጡ ታጣቂዎች ሰሞኑን ወደ ተሐድሶ ማዕከላት እየገቡ መሆናቸዉን ገልጸዋል።
ሰላምም ጀግና አለው ያሉት ምክትል ጠቅላይ ሚኒስትሩ ከጦርነት በላይ ሰላም ዋጋ ያስከፍላል። ትዕግሥት ያስጨርሳል፤ ትከሻ ያጎብጣል፤ እልክን ያስውጣል፤ ደካማ ያስመስላል። ለዚህ ነው የሰላም ጀግንነት ከጦርነት ጀግንነት የሚበልጠው ብለዋል።
ሰላማዊ አማራጭን የተከተሉ፣ ሐሳባቸውን በጠረጴዛ ዙሪያ ለማቅረብ የፈቀዱ፣ የሠለጠነውን መንገድ ለመሞከር የቆረጡ ታጣቂዎች ሰሞኑን ወደ ተሐድሶ ማዕከላት እየገቡ ነው።
ይህ የሰላም ጀግንነት በመሆኑ ከአድናቆት ጋር እናመሰግናቸዋለን። በዚህ ውሳኔያቸው ሀገር ታተርፋለች፣ እናት ትጽናናለች፣ መሬትም ታርፋለች። በዚህ ውሳኔያቸው አዲስ የሰላም ጀግንነት ታሪክ ይጽፋሉ ብለዋል።
ሌሎችም የእነርሱን አርአያ ተከትለው የሰላምን አማራጭ እንደሚመርጡ እናምናለን። የዘመናችን ትልቁ ጀግንነት የሰላም ጀግንነት ነውና።
የሰላም ጀግንነትን ዐውቀው ለወሰኑ፣ ላስተባበሩ፣ መርቀው ለተቀበሉ፣ ለሰላም እና ለሕግ የበላይነት ሁሌም የማይናወጥ አቋሙን ላሳየው ሕዝባችን የከበረ ምስጋና አቀርባለሁ ሲሉ ገልጸዋል።
