ደረቅ ጭነትና የተለያዩ ሸቀጣ ሸቀጦች የጫኑ ተሽከርካሪዎች ለጫኑት እቃ ዕለታዊ ደረሰኝ ሊያቀርቡ እንደሚገባ የአዲስ አበባ ከተማ አስተዳደር የገቢዎች ቢሮ ገልጿል፡፡
ወደ አዲስ አበባ ከተማ የሚገቡ፣ ከከተማዋ የሚወጡና በከተማዋ ውስጥ የሚንቀሳቀሱ የደረቅ ጭነት ተሽከርካሪዎች፣ ሚኒባሶችና አነስተኛ ሽፍን መኪኖች ላይ የኦፕሬሽን ሥራዎች እያከናወነ መሆኑን የአዲስ አበባ ከተማ አስተዳደር ገቢዎች ቢሮ አስታውቋል።
ቢሮው እያካሄደ ያለው የኦፕሬሽን ሥራ ተሽከርካሪዎቹ ጭነው የሚንቀሳቀሱት ልዩ ልዩ ሸቀጦች፣ ምርቶችና የኮንስትራክሽን ግብዓቶች በሕጋዊ ግብይት በደረሰኝ የተፈፀሙ ስለመሆናቸው ለማረጋገጥ ያለመ መሆኑን ቢሮው ለ ኤ ኤም ኤን ዲጂታል በላከው መረጃ አስታውቋል።
በሳምንቱ በተካሄዱ የቁጥጥር ሥራዎች በኮልፌ ቀራኒዮ ክፍለ ከተማ 11፣ በንፋስ ስልክ ላፍቶ ክፍለ ከተማ 4፣ በአቃቂ ቃሊቲ 5፣ በለሚ ኩራ 7 እንዲሁም በጉለሌ 7 ተሸክርካሪዎች ዕለታዊ ደረሰኝ ሳይዙ በከተማዋ ውስጥ ሲንቀሳቀሱ የተገኙ አስተዳደራዊ የቅጣት እርምጃ የተወሰደባቸው ሲሆን፤ ለጫኑት እያንዳንዱ ዕቃም ደረሰኝ እንዲቆርጡ መደረጋቸውም ተመላክቷል።
ቢሮው ትልልቅም ይሁኑ ትንንሽ መኪኖች እንቅስቃሴ ሲያደርጉ ከከተማው ትራፊክ ማኔጅመንት ባለሥልጣን ጋር በመቀናጀት ደረሰኝ ስለመያዛቸው የማረጋገጥና ያልያዙት ላይ አስተዳደራዊ እርምጃ በመውሰድ ለእያንዳንዱ ለጫኑት እቃ ደረሰኝ እንዲቆርጡ እየተደረገ ነው ተብሏል፡፡
በከተማዋ ጭነት የጫኑ ማንኛውም አይነት ተሽከርካሪዎች፣ ተሳቢዎች፣ ሚኒባሶች እና ሽፍን መኪኖች ለጫኑት እቃ ዕለታዊ ደረሰኝ የተቆረጠበት መረጃ ስለመያዛቸው የማረጋገጥ ተግባር ተጠናክሮ እንደሚቀጥል ቢሮው አስታውቋል፡፡
ማንኛውም የተሽከርካሪ ባለቤትና አሽከርካሪ እንዲሁም ነጋዴ በመኪና ላይ ጭኖ ለሚያንቀሳቅሰው ማንኛውም ምርት በዕለቱ የተቆረጠ ደረሰኝ የመያዝና ለከተማው የገቢዎች ቢሮ የቁጥጥር ሠራተኞች የማሳየት ኃላፊነት እንዳለበት ቢሮው አሳስቧል።
