የአዲስ አበባ ከተማ አስተዳደር ከንቲባ አዳነች አቤቤ በለነገዋ የሴቶች ተሀድሶና ክህሎት ማበልፀጊያ ማዕከል በተለያዩ ሞያዎች የሰለጠኑ 810 የ3ኛ ዙር ሰልጣኞች መርቀው ወደ ስራ ማሰማራታቸውን ገለጹ።
ከንቲባዋ በማህበራዊ ትስስር ገፃቸው ባሰፈሩት መልዕክት፣ ማዕከሉ ለተለያዩ ማህበራዊ ችግሮች ተጋልጠው ጎዳና የወደቁ፣ ለሴትኛ አዳሪነት የተጋለጡ ሴቶችን ከጎዳና በማንሳት በተለያዩ ክህሎቶች እያሰለጠነ ወደ ስራ እያሰማራ ይገኛል ብለዋል።
የዛሬውን ጨምሮ ከዚህ ቀደም በተለያዩ ዙሮች አሰልጥነን ወደ ስራ ያሰማራናቸው ሴቶች አጠቃላይ ቁጥር 1 ሺህ 692 መድረሱንም አንስተዋል።
ይህ ስራ ከተማችን ውስጥ ሌት ተቀን ከምንከውናቸው ሌሎች የልማት ስራዎች አልቀን የምናየዉ አንዱና ዋነኛ ስራችን ነው ሲሉም ገልጸዋል።
ሴት እህቶቻችን እነሱ ባልፈጠሩት ችግር ለመራር የህይወት ፈተና ሲጋፈጡ፣ ሲወገዙ፣ ሲገፉ፣ በረንዳ ሲወድቁ፣ ለአስከፊው የሴተኛ አዳሪነት ህይወት ሲጋለጡ ይስተዋላል ያሉት ከንቲባዋ፣ የችግሩ ዋነኛ ምንጭ እነሱ ሳይሆኑ በዋናነት ድህነት እና ኋላቀርነት መሆኑን ጠቁመዋል።
ይህን ችግር ከስሩ የሚነቅለው ብቸኛዉ መንገድ ደግሞ የጀመርነው የኢትዮዽያ ሁለንተናዊ ብልፅግና እውን መሆን ነው በማለትም አክለዋል።
ለዚህም ሌት ተቀን መስራታችን ይቀጥላል ብለዋል።
የዛሬ ተመራቂ ተማሪዎች ትናንት ከነበሩበት የጎዳና ላይ ህይወት ወጥተው፣ ከአስከፊ ህይወት ተላቀው፣ ከሱስ ተጋላጭነታቸው እና ከጤና ችግሮች ወጥተው በአዲስ ህይወት ጅማሮ ላይ ሆነው በማየታችን እጅግ ደስተኞች ነን ሲሉም ነው የገለጹት።
ተመራቂዎች በቀጣይ ዳግም ላይመለስ በተቀየረው የትላንት ማንነታችሁ ሳትሸማቀቁ ፣ በማዕከሉ ቆይታ ያካበታችሁትን እውቀት፣ ክህሎት፣ መልካም ስነ ምግባር በስራ ላይ እንድታውሉ በማልትም አስገንዝበዋል።
በየእለቱ ራሳችሁን በእውቀትና ቴክኖሎጂ ከጊዜዉ ጋር እያሳደጋችሁ ለሌሎች እህቶቻችሁ ምሳሌ እንድትሆኑ አደራ እላለሁም ብለዋል።
ለዚህ በርካቶችን ከጨለማ ህይወት ታድጎ በቀሪ ህይወታቸው ብርሃን እንዲፈነጥቅ ላደረገ በጎ ስራ በእውቀት፣ በሞያ፣ በሀብት ድጋፍ ያደረጉ ባለድርሻ አካላት፤ ባለሀብቶች፣ የከተማዋ አመራሮች በተለይም አጠቃላይ የተቋሙን አመራሮችና ባለሙያዎች በተመራቂዎቹ ስም አመሰግነዋል።
