በአዲስ አበባ 200 የሚሆኑ የተለያየ የኮከብ ደረጃ ያላቸው ሆቴሎች እንደሚገኙ ተገልጿል
አዲስ አበባ የኢትዮጵያ ብቻ ሳትሆን የአፍሪካ መዲና እና በዓለም ሶስተኛዋ የዲፕሎማሲ ማዕከል ናት፡፡ ከተማዋ ሚናዋ ከፍ ያለ ቢሆንም መሰረተ ልማቷም ሆነ የምታቀርበው አገልግሎት ስሟንና ሚናዋን የሚመጥን ነበረ ማለት አይቻልም፡፡ ከቅርብ ዓመታት ወዲህ ልክ እንደ ስሟ “ውብ አበባ” እና ሚናዋን የምትመጥን እንድትሆን ከዚህ ቀደም ታይቶ በማይታወቅ ሁኔታ በቱሪዝም ልማት የተለያዩ ስራዎች ተሰርተዋል፡፡
በከተማዋ የአንድነት እና የእንጦጦ ፓርኮች፣ የወዳጅነት አደባባይ፣ የመስቀል አደባባይ፣ የዓድዋ ድል መታሰቢያ፣ የሳይንስ ሙዚየም፣ የአዲስ ዓለም አቀፍ ኮንቬንሽን ማዕከልና ሌሎች ግዙፍ የቱሪዝም መዳረሻዎች ተገንብተዋል፡፡ በኮሪደር ልማት መንገዶችን የማስፋትና የማሳመር፣ የአረንጓዴ ስፍራዎች እና የተለያዩ መሰረተ ልማቶች ተሰርተዋል። ከተማዋ ያላት ምቹ የአየር ንብረት፣ የተረጋጋ ሰላም፣ የዲፕሎማሲ ማዕከልነት እና የቱሪዝም መዳረሻ ልማት አኳያ ዓለም አቀፍ ስብሰባዎችን፣ ኮንፈረንሶችን እና ኤግዚቢሽኖችን ማስተናገድ እንድትችል ምቹ ሁኔታ ፈጥሮላታል፡፡
መዲናዋ በአሁኑ ወቅት በዓለም አቀፍ ደረጃ በኮንፈረንስ ቱሪዝም መዳረሻነት ተመራጭ እየሆነች መጥታለች፡፡ የአዲስ አበባ ከተማ ቱሪዝም ኮሚሽን ሪፖርት እንደሚያመላክተው በ2017 በጀት ዓመት ብቻ 150 ዓለም አቀፋዊ ፋይዳ ያላቸው ኮንፈረንሶች በአዲስ አበባ ተካሂደዋል፡፡ በተያዘው በጀት ዓመትም 2ኛው የአፍሪካ የአየር ንብረት ለውጥ ጉባኤን ጨምሮ በርካታ ሰዎች የተሳተፉባቸው ትላልቅ ጉባኤዎችን አስተናግዳለች፤ እያስተናገደች ትገኛለች፡፡ በቅርቡም ኢትዮጵያ ከሁለት ዓመት በኋላ የሚካሄደውን፣ ከ50 ሺህ በላይ ሰዎች የሚታደሙበትን “ኮፕ 32” የአየር ንብረት ለውጥ ጉባኤን እንድታስተናግድ መመረጧ ይታወቃል፡፡
ይህን ተከትሎም መንግስት ከሰሞኑ የውጭ ጉዳይ ሚኒስትር ጌዲዮን ጢሞቴዎስን (ዶ/ር) የኮፕ 32 ተወካይ ፕሬዝደንት አድርጎ መድቧል። በተጨማሪም የኢፌዴሪ ጠቅላይ ሚኒስትር ዐቢይ አሕመድ (ዶ/ር) በተገኙበት ቁልፍ የዝግጅት ተግባራትን ለማቀናጀት የሚያስችል የብሔራዊ አስተባባሪ ኮሚቴ ስብሰባ መደረጉ የሚታወስ ነው።
መዲናዋ በኮንፈረንስ ቱሪዝም መዳረሻነቷ ከፍተኛ እድገት እያሳየች የምትገኝ ሲሆን፤ በዚሁ ልክ ሆቴሎቿ የሚሰጡት አገልግሎት በጥራትና ተወዳዳሪነት ማደግ ይጠበቅበታል፡፡
ሆቴሎች ምን እየሰሩ ነው?
በአዲስ አበባ ከተማ ከሚገኙ ባለ አምስት ኮከብ ሆቴሎች መካከል ኢሊሊ ኢንተርናሽናል ይጠቀሳል፡፡ ሆቴሉ ባሉት 155 የመኝታ ክፍሎች፣14 አዳራሾች የመኝታ፣ የስብሰባና ኮንፈረንስ አገልግሎቶችን ይሰጣል፡፡ በተጨማሪም በባርና ሬስቶራንት የምግብና መጠጥ እንዲሁም የጂም፣ የዋና፣ ሳውና፣ ስቲምና የተለያዩ አገልግሎቶችን እየሰጠ እንደሚገኝ የሆቴሉ ምክትል ዋና ስራ አስኪያጅ አቶ ሚኪያስ ተስፋዬ ይናገራሉ፡፡
“በአዲስ አበባ የኮንፈረንስ ቱሪዝም ከጊዜ ወደ ጊዜ እያደገ መጥቷል። ከተማዋም የኮንፈረንስ ቱሪዝም መዳረሻ ሆናለች” ያሉት አቶ ሚኪያስ፣ በሆቴሉ የሚሰጠው አገልግሎት ጥራትና ተወዳዳሪነት ያለው እንዲሆን በተለያዩ ጊዜያት ለሰራተኞች በደንበኞች አያያዝ፣ ንጽህና አጠባበቅና በመሳሰሉ ጉዳዮች ላይ ተከታታይ ስልጠና በመስጠት እንዲበቁ እየተደረገ ነው፡፡ ለእንግዶችም ኢትዮጵያን እንዲያውቁ ባህሏንም እንዲተዋወቁ ስራዎች እየተሰሩ እንደሆነ ተናግረዋል፡፡
ለኮንፈረንስና ለስብስባ ወደ ከተማዋ ለሚመጡ እንግዶች የተሻለ አገልግሎት ለማቅረብ፣ በአገልግሎቱ ረክተው ለሌሎችም እንዲያካፍሉ ለማድረግ፣ በዘርፉ ያለውን ፍላጎትም ለመሙላት ሆቴሉ የእድሳትና የማስፋፊያ ስራዎችን እያከናወነ ይገኛል፡፡ ሰራተኛውን የማብቃት ስራንም አጠናክሮ እንደሚቀጥልበት አቶ ሚኪያስ ገልጸዋል።
ሳሮ ማርያ በመዲናዋ ከሚገኙ ባለአራት ኮከብ ሆቴሎች መካከል አንዱ ነው፡፡ 96 የመኝታ ክፍሎች፣ 4 አዳራሾች፣ ሁለት ሬስቶራንቶችና ሁለት ባር አሉት፤ የጂም፣ ሳውና፣ ማሳጅ እና መሰል አገልግሎቶችንም ይሰጣል፡፡
የሆቴሉ የቢዝነስ ዴቨሎፕመንት ማናጀር አቶ ኤፍሬም ተስፋዬ እንደሚገልፁት፤ ሆቴሉ ላለፉት 13 ዓመታት አገልግሎት ሲሰጥ የቆየ ሲሆን፤ የሆቴል ኢንዱስትሪ ከጊዜ ወደ ጊዜ እያደገ ከመሆኑ አኳያ ከዘመኑ ጋር አብሮ ለመራመድ ትኩረት ሰጥቶ እየሰራ ይገኛል፡፡ በመሆኑም በሆቴሉ የእድሳት (Reinnovation) እና የማስፋፊያ ስራዎች እየተከናወኑ ይገኛሉ፡፡ አልጋዎችን ጨምሮ የተለያዩ ዕቃዎችን በመቀየር ተገልጋዮች የተሻለና ዘመኑን የሚመጥን አገልግሎት እንዲያገኙ እየተሰራ ነው፡፡
በሆቴሉ በሚሰጡ አገልግሎቶች ሰዎች ተደስተው እንዲሄዱ ማድረግ ያስፈልጋል፡፡ ከዚህ አኳያ ጥራት ያለው አገልግሎት ለማቅረብ ለሰው ሀይሉ ትኩረት በመስጠት ተከታታይ ስልጠናዎች ይሰጣል፡፡ ከዚህ ባሻገር እንግዶች በአገልግሎቱ ያላቸውን እርካታ በመለካት ሁልጊዜ በተሻለ ሁኔታ እንዲስተናገዱ እየተሰራ መሆኑን አቶ ኤፍሬም ይናገራሉ፡፡
ላለፉት 20 ዓመታት በሆቴል ዘርፍ ሲሰሩ መቆየታቸውን የሚናገሩት አቶ ኤፍሬም፣ “በቅርብ ዓመታት አዲስ አበባን ውብ፣ ፅዱና አረንጓዴ በማድረግ የተሰሩ ስራዎች ለሆቴል ኢንዱስትሪው ትልቅ ትርጉም አለው፡፡ በዚህ ምክንያት በርካታ ኮንፈረንሶች ወደ ከተማዋ እየመጡና በአዲስ አበባ አድርገው ወደ ሌላ አካባቢ የሚሄዱ ቱሪስቶች ቆይታቸውን እያራዘሙ ይገኛሉ፡፡” ሲሉ ነግረውናል፡፡
ሆቴሉ የሚሰጠውን አገልግሎት ለማስፋት የማስፋፊያ ግንባታዎች በአዲስ አበባ እና ቢሾፍቱ ከተሞች በመከናወን ላይ እንደሚገኝ አቶ ኤፍሬም ያነሳሉ። በቢሾፍቱ ከተማ 300 አልጋዎችና የተለያዩ አገልግሎቶች የሚሰጥ የሳሮ ማርያ ሪዞርት ግንባታም በመጠናቀቅ ላይ እንደሚገኝ አያይዘው ገልጸዋል፡፡
ጌትፋም ሌላኛው በመዲናዋ የሚገኝ ባለአራት ኮከብ ሆቴል ነው፡፡ ሆቴሉ 115 የመኝታ ክፍሎች፣ ስድስት የስብሰባ አዳራሾች፣ የሳውና እና ስቲም አገልግሎት፣ የዋና፣ ጂም እንዲሁም ከሆቴል ውጪ በተለያዩ ቦታዎች የምግብና መጠጥ አገልግሎት (ኬተሪንግ) ይሰጣል። በአፍሪካ ህብረት እና በተባበሩት መንግስታት የአፍሪካ ኢኮኖሚክ ኮሚሽን ቅጥር ግቢ ውስጥ የራሱ ሬስቶራንት በመክፈት እየሰራ እንደሚገኝም የሆቴሉ ሴልስና ማርኬቲንግ ዳይሬክተር አቶ ሚኪያስ ተስፋዬ ይናገራሉ፡፡
ዳይሬክተሩ እንደሚገልፁት፤ ሆቴሉ ጥራት ያለውና ተወዳዳሪ አገልግሎት እየሰጠ ይገኛል፡፡ በአዲስ አበባ ዓለምአቀፋዊ ጉባኤዎች፣ ስብሰባዎች፣ ኤግዚቢሽኖች፣ ባዛሮችና የተለያዩ የቱሪዝም ፕሮግራሞች ሲካሄዱ የመኝታ፣ የምግብ፣ የመጠጥ፣ የስብሰባና የተለያዩ አገልግሎቶችን ለማቅረብ ጨረታዎች ውስጥ በመሳተፍና ዝግጅት በማድረግ አገልግሎት እያቀረበ ይገኛል፡፡ በዚህም ከፍተኛ ልምድ አለው፡፡
በሆቴሉ ውስጥ የቱሪስት ዴስክ የሚገኝ ሲሆን ቱሪስቶች በከተማዋ የሚገኙ እንደ እንጦጦ፣ ወዳጅነት፣ አንድነት፣ የዓድዋ ድል መታሰቢያ እና መሰል መዳረሻዎችን እንዲጎበኙ መረጃ ይሰጣል፡፡ ከዚህም ባሻገር መዳረሻ ቦታዎችን እንዲጎበኙ ከመንግስት ጋር በመሆን የማመቻቸት ስራ እየሰራ እንደሚገኝ አቶ ሚኪያስ አብራርተዋል፡፡
ባለድርሻ አካላት ምን እየሰሩ ነው?
ወይዘሮ ገነት ይመር በአዲስ አበባ ቱሪዝም ኮሚሽን የአገልግሎቶች ብቃት ማረጋገጥና ደረጃ ምደባ ዳይሬክተር ናቸው፡፡ እሳቸው እንደተናገሩት፣ ለተለያዩ ኮንፈረንሶች ወደ አዲስ አበባ ከተማ የሚመጡ ቱሪስቶችን በብቃት ማስተናገድ የሚያስችሉ ሆቴሎች ይገኛሉ፡፡ በአሁኑ ወቅት 200 የሚሆኑ በተለያየ የኮከብ ደረጃ የሚገኙ እንዲሁም የኮከብነት ደረጃ ባይኖራቸውም ለቱሪስቶች ተመራጭ የሆኑ ሆቴሎች፣ የእንግዳ ማረፊያዎች እንዲሁም አፓርትመንቶች ይገኛሉ፡፡
በባለ ኮከብ ሆቴሎች ደረጃ በአንድ ጊዜ ለበርካታ እንግዶች የመኝታ አገልግሎት መስጠት የሚያስችል አቅም አለ፡፡ ከወራት በፊትም በርካታ ተሳታፊዎች የታደሙበትን ሁለተኛውን የአየር ንብረት ለውጥ ጉባኤ በተሳካ ሁኔታ ማስተናገድ መቻሉን ወይዘሮ ገነት በማሳያነት አንስተዋል፡፡
ወይዘሮ ገነት ሆቴሎች ቱሪስቶች ረጅም ሰዓት እረፍታቸውን የሚያሳልፉባቸውና የሚዝናኑባቸው ቦታዎች ናቸው። ቱሪስቶች ጉብኝት ካደረጉ ወይም ስብሰባዎች ላይ ከተሳተፉ በኋላ ሆቴል ውስጥ ሲያድሩ ምቹና ጥራት ያለው አገልግሎት ማግኘት ይፈልጋሉ፡፡ ከዚህ አኳያም በከተማዋ የሚገኙ ሆቴሎች ጥራት ያለውና ተወዳዳሪ አገልግሎት መስጠት እንዲችሉ የተለያዩ ድጋፎች እየተደረገ እንደሚገኝ አብራርተዋል፡፡
የአዲስ አበባ ቱሪዝም ኮሚሽን በከተማዋ ኹነቶች ወይም የተለያዩ ስብሰባዎችና ጉባኤዎች ሲኖሩ፣ አስቀድሞ በሆቴሎቹ በመገኘት የሚሰጡት የመኝታ፣ የምግብ፣ መጠጥና የተለያዩ አገልግሎቶችን የመፈተሽ፣ ጉድለት ካለ እንዲያስተካከሉ በተለይ ትላልቅ ጉባኤዎች ከሆኑ ደግሞ ከሚሰቅሏቸው ባንዲራዎች ጀምሮ አጽድተው እንዲሰቅሉ፣ የሆቴሎች ውጫዊ ገፅታ ሳቢ እንዲሆን ክትትልና ድጋፍ ያደርጋል፡፡
ከዚህ ባሻገርም የሆቴሉን ዘርፍ ለማበረታታት በሆቴልና ሬስቶራንት ዘርፍ በኮከብ ደረጃ ሆቴል የሚገነቡ ባለሀብቶች ከውጭ ከግንባታ ጀምሮ የሚያስገቧቸውን እቃዎች ከቀረጥ ነፃ እንዲገቡ ተፈቅዷል።
ሆቴሎች እንግዶቻቸው ቦሌ ዓለም አቀፍ አየር ማረፊያ ከደረሱ በኋላ ወደ ሆቴል እና ከሆቴል ወደ አየር መንገድ የሚያመላልሱበት መኪና ከቀረጥ ነፃ እንዲያስገቡ ተመቻችቶላቸዋል። እነዚህንና መሰል ድጋፎች የሆቴሎች አገልግሎት እና የቱሪስቱን እርካታ የሚያሳድግ እንደሆነ ወይዘሮ ገነት ያነሳሉ፡፡
በቀጣይም የሆቴል አገልግሎቱን ተደራሽ ለማድረግ የኮከብነት ደረጃ የሌላቸው፤ ነገር ግን አነስተኛ በጀት በመያዝ ለጉብኝት የሚመጡ እንግዶችን ማስተናገድ የሚችሉ ለቱሪስቶች ተመራጭ የሆኑ ሆቴሎች (Tourist Recommended Hotels) ጥራታቸውን እንዲያሳድጉና የሚያስፈልጉ መሰረታዊ ጉዳዮችን እንዲያሟሉ ድጋፍ ይደረጋል። ይህም ወደ ከተማው የሚመጡ ቱሪስቶችን የማስተናገድ አቅም ከፍ እንዲል እና ቆይታቸውን እንዲያራዝሙ የሚያደርግ እንደሆነ ወይዘሮ ገነት አስረድተዋል፡፡
ከዚህ በተጨማሪ በሆቴሎች ውስጥ የሚሰሩ ሰራተኞች የሥራ ላይ ስልጠና በስፋት ታቅዷል፡፡ “እስከአሁንም አዲስ አበባ የሚመጡ እንግዶችን የምታሳድርበት አቅም አጥታ አታውቅም” ያሉት ወይዘሮ ገነት፤ በርካታ እንግዶችን ማስተናገድ የሚቻልበት አቅም እንዲፈጠር በግንባታ ላይ ያሉ ሆቴሎች ተጠናቅቀው ወደ አገልግሎት እንዲገቡ በቅርብ የመከታተል ስራ እንደሚከናወን ጠቁመዋል፡፡
የአዲስ አበባ ሆቴል ባለንብረቶች ማህበር ሆቴሎች የሚያጋጥሟቸው ችግሮች እንዲቀረፉ፣ የተሻለና ጥራት ያለው አገልግሎት እንዲሰጡ ጥናቶችን በማድረግ የመፍትሔ ሀሳቦችን በማመላከት የሆቴሎች ድምጽ በመሆን እየሰራ ይገኛል፡፡ የማህበሩ ፕሬዝዳንት ወይዘሮ አስቴር ሰለሞን እንደገለፁት፣ የአዲስ አበባ ሆቴል ባለንብረቶች ማህበር በከተማዋ የሚገኙ 183 የተለያየ የኮከብ ደረጃ ያላቸው ሆቴሎችን በአባልነት በማቀፍ እየተንቀሳቀሰ ይገኛል፡፡
ማህበሩ በሆቴሉ ዘርፍ እያጋጠሙ ያሉ ችግሮች እንዲቀረፉ የአዲስ አበባ ከተማ ቱሪዝም ኮሚሽን እና የቱሪዝም ሚኒስቴር ጋር በቅርበት እየሰራ ነው፡፡ ሆቴሎች የሚሰጡት አገልግሎቶች ጥራትና ደረጃቸውን የጠበቁ እንዲሁም ተወዳዳሪ እንዲሆኑ በግልና ከተለያዩ ተቋማት ጋር በመሆን ተከታታይ ስልጠናዎችን በማዘጋጀት እየተሰጡ ነው፡፡ በዲጂታል ማርኬቲንግ፣ በንጽህና አጠባበቅ፣ የቤት አያያዝ፣ የእንግዳ አቀባበልና መሰል ጉዳዮች ከሚሰጡ ስልጠናዎች መካከል ይጠቀሳሉ፡፡
ከዚህም ባሻገር ማህበሩ በከተማዋ ጉባኤዎች ሲካሄዱ፣ ሆቴሎች የሚመጡ እንግዶችን በአግባቡ እንዲያስተናገዱ የማስተባበር ስራ ያከናውናል፡፡ ለምሳሌ ከወራት በፊት ሁለተኛው የአፍሪካ አየር ንብረት ለውጥ ጉባኤ በአዲስ አበባ ሲካሄድ፣ መንግስትና ማህበሩ ከሆቴሎች ጋር በመሆን በሰሩት ስራ ጉባኤውን በተሳካ መልኩ ማከናወን ተችሏል፡፡ ማህበሩ በዓመት አንድ ጊዜ ጠቅላላ ጉባኤ ሲያካሄድ ባለሆቴሎች እና የመንግስት አካላት የሚገናኙበት የፓናል ውይይት በማዘጋጀት በዘርፉ ያሉ ችግሮች እንዲፈቱ እየሰራ እንደሚገኝ ወይዘሮ አስቴር አብራርተዋል፡፡
ወይዘሮ አስቴር እንደሚገለጹት፤ በአዲስ አበባ ትላልቅ ኮንፈረንሶችን ለማስተናገድ የሚያስችሉ ልማቶች በሰፊው ተሰርተዋል፡፡ አዳዲስ የቱሪዝም መዳረሻዎችን በመገንባት፣ ነባሮችን በማደስ፣ መንገዶችን በማስፋት፣ በፅዳትና ውበት የተሰሩ ስራዎችም ከተማዋን ለጎብኚዎች ምቹ እንድትሆን አድርገዋል። ለኮንፈረንስ የሚመጡ እንግዶች ከጉባኤው በኋላ ቆይታቸውን ማራዘም የሚችሉበት ሁኔታ ተፈጥሯል፡፡
ሆቴሎች የእንግዶች ማረፊያ እንደመሆናቸው፣ የቱሪዝም ገበያው ሲያድግ በዚያው ልክ የሚሰጡት አገልግሎት እየሰፋና እያደገ መሄድ ይኖርበታል፡፡ ገበያው መምጣቱ አገልግሎቱ እንዲሻሻል እንደሚያደርገውም ወይዘሮ አስቴር ጠቁመዋል፡፡
የቱሪዝም ባለሙያው አያሌው ሲሳይ (ዶ/ር) በበኩላቸው፤ ከሆቴል አገልግሎት ጋር በተያያዘ የአስተናጋጆች አቀባበል፣ ገፅታ፣ አለባበስ፣ የቋንቋ ችሎታ፣ የአገልጋይነት ፍላጎት እንዲሁም የሚቀርበው የምግብና መጠጥ፣ መኝታ ጥራት ደረጃውን የጠበቀ መሆን ትኩረት የሚሹ ጉዳዮች እንደሆኑ ያነሳሉ፡፡
የቱሪዝም ባለሙያው አያሌው (ዶ/ር) እንደሚሉት፣ አዲስ አበባ በኮንፈረንስ ቱሪዝም የተሻለ ልምድ ያላት ከተማ ናት፡፡ የተባበሩት መንግስታት የአፍሪካ ኢኮኖሚ ኮሚሽን እና የአፍሪካ ህብረት (የአፍሪካ አንድነት ድርጅት) ሲመሰረት ጀምሮ ኮንፈረንሶችን ስታስተናግድ ቆይታለች፡፡ ነገር ግን አዲስ አበባ የኮንፈረንስ ቱሪዝም ማዕከል እንደመሆኗ አሁን እንደሚታየው የሚካሄዱ ጉባኤዎችና ተሳታፊዎች መጠን በየጊዜው እየጨመረ መሄዱ አይቀርም፡፡ ከዚህ አኳያ በርከት ያለ የመኝታ ክፍሎች ያላቸውና ጥራት ያለው አገልግሎት የሚሰጡ ሆቴሎች እንዲኖሩ መትጋት ያስፈልጋል፡፡
በስንታየሁ ምትኩ
