ልጆች የበጎ አድራጎት ተግባር በዕድሜ፣ በትምህርት ዝግጅት፣ በሀብት… የተገደበ እንዳልሆነና ፍላጎት ያለው ሰው በቻለው አቅም ሊሳተፍ እንደሚችል ምን ያህሎቻችው ታውቃላችሁ? ለዚህ መልካም ተግባር ልምምድ ይሆን ዘንድ በትምህርት ቤታችሁ ያሉ ክበባትን ምን ያህል በአግባቡ ትጠቀሙባቸዋላችሁ? ከጓደኞቻችሁ ጋር በጉዳዩ ዙሪያ ሀሳብ ተቀያየሩ፡፡ እኛ ደግሞ በዚህ አይነት ተግባር የሚሳተፉ ተማሪዎቹ ተሞክሮ እና በክበቡ ውስጥ ገብተው መሳተፋቸው የተፈጠረባቸውን ስሜት እንደሚከተለው አቅርበንላችኋል፡፡
ስሜ ሀገርነሽ አበበ ይባላል፡፡ በዓለም ማያ የመጀመሪያ እና መካከለኛ ደረጃ ትምህርት ቤት የ8ኛ ክፍል ተማሪ ነኝ። በትምህርት ቤቱ የበጎ አድራጎት ክበብ አባል ነኝ፡፡ የዚህ ክበብ አባል የሆንኩት ከ5ኛ ክፍል ጀምሮ ነው። የገባሁበት ዋና አላማም በበጎ ፍቃድ ተግባራት የትምህርት ቤቱን ማህበረሰብ ለማገልገል ነው፡፡ በዚህም በምሳ ሰዓት መጋቢ እናቶችን አግዛለሁ፡፡ ምግብ ለተማሪዎች እሰጣለሁ፤ የተመገቡበትን ሳህንም እሰበስባለሁ፡፡ ተማሪዎች ሲወድቁ ከጓደኞቼ ጋር በመሆን የተጎዱትን በማንሳት የመጀመሪያ ደረጃ የህክምና እርዳታ እንዲያገኙ ወደ ክሊኒክ እወስዳለሁ፡፡
የኢኮኖሚ ችግር ያለባቸውን ተማሪዎች ለማገዝም ከክበቡ አባላት ጋር በመሆን በየክፍሉ እየዞርን ገንዘብ በመሰብሰብ እንዲረዱ እናደርጋለን። በትምህርታቸው ዝቅተኛ ውጤት ያላቸው ተማሪዎችንም የማስጠናት ስራ እንሰራለን፡፡ ከጎበዝ ተማሪዎች ጋርም እንዲያጠኑ እናደርጋለን። የክበቡ አባል ሆኜ በመስራቴ በጣም ደስተኛ ነኝ። ይህንን አሁን የጀመርኩትን የበጎ አድራጎት ስራ ትልቅ ስሆንም አጠናክሬ እቀጥላለሁ። በተለይም አቅመ ደካሞችን የመርዳት ፍላጎት አለኝ፡፡
ነጅዋ ረሻድ እባላለሁ፡፡ በዓለም ማያ የመጀመሪያ እና መካከለኛ ደረጃ ትምህርት ቤት የ6ኛ ክፍል ተማሪ ነኝ። እኔም የበጎ አድራጎት ክበብ አባል ሆኜ መስራት የጀመርኩት ከ4ኛ ክፍል ጀምሮ ነው፡፡ ወደ ክበቡ ልገባ የቻልኩት በትምህርት ቤት ውስጥ የአእምሮ እድገት ውስንት ያለባቸው ልጆች ለመንቀሳቀስና ለመማር ሲቸገሩ በማየቴ ነው፡፡ ከዚህ አንጻር ትምህርታቸውን እንዳያቋርጡ እጃቸውን ይዤ ከክፍል ወደ ክፍል እንዲገቡና እንዲወጡ የማድረግ ስራ እሰራለሁ፡፡
በበዓል ጊዜ ደግሞ አቅም የሚያንሳቸው ልጆችን በትምህርት ቤት ተዋጥቶ እንዲረዱ የማድረግ ስራ እንሰራለን፡፡ እኔና ሌሎች የክበቡ አባላት በጋራ በመሆን መደጋገፍ ተገቢነት እንዳለው መልእክት በሚኒ ሚዲያ በማስተላለፍና ግንዛቤ እንፈጥራለን። ድጋፍ እንዲያደርጉም እናበረታታለን። ሌላው የባህሪ ችግር ያለባቸውን ተማሪዎች በመምከር ጥሩ ሥነ ምግባር እንዲኖራቸው የማድረግ ስራ ከጓደኞቼ ጋር በመሆን እንሰራለን፡፡ ትምህርታቸው ላይ እንዲያተኩሩ እንመክራለን፡፡ በጎ አድራጎት ማለት ባለን አቅም ሰዎችን መርዳት ነው፡፡ በልጅነታችን እንዲህ አይነት ተግባርን መለማመድ አለብን፡፡ በጎ አድራጎት ላይ መሳተፍ ያስደስታል፡፡ ሁላችሁም ብትሳተፉ እላለሁ፡፡
አቶ ዳንኤል ገብረዮሀንስ እባላለሁ፡፡ በሙያዬ የሥነ ልቦና አማካሪ ነኝ፡፡ ልጆች ከልጅነታችሁ ጀምሮ ከወላጆቻችሁና አሳዳጊዎቻችሁ የተሰጣችሁን አልያም የተደረገላችሁን መልካም ነገር በትምህርት ቤት ውስጥ ለምታገኟቸው ጓደኞቻችሁ ማካፈልና መስጠት ይኖርባችኋል። ተፈጥሮ ለመቀበል ብቻ ሳይሆን ለመስጠትም የታደለች ናት፡፡ ስለሆነም ልጆች፤ ፍቅር፣ ጊዜ፣ እውቀት የመሳሰሉትን ማካፈል ትችላላችሁ፡፡ በትምህርት ቤት ውስጥ የተቸገሩ ተማሪዎችን ስታዩ ደብተር፣ እስኪርብቶ፣ ወረቀት እንዲሁም ካላችሁ ላይ ለሚያስፈልጋችሁ የማጋራት ልምድን ማዳበር አለባችሁ፡፡ እንደነዚህ አይነት ተግባራትን ከልጅነታችሁ ጀምሮ እያዳበራችሁ ስትመጡ የመጀመሪያው ደስተኞች እናንተ ትሆናላችሁ። ምክንያቱም “ለችግር ደርሻለሁ” የሚል አስተሳሰብ ስለምታዳብሩ፡፡ ሌላው አንድነታችሁንና እርስ በእርስ የመተሳሰብ ችሎታችሁን ያሳድግላችኋል። ኃላፊነት የመሸከም ችሎታችሁንም ያጎለብትላችኋል፡፡ ስለዚህ ልጆች በጎ ነገር መስራትና በጎ ነገር የሚሰራበት ቦታ መሳተፍ ሥነ ልቦናዊ ጥቅም ታገኛላችሁ።
በለይላ መሀመድ
