አዲስ አበባ የብዝሃነት መገለጫ እና የመላዉ ብሔር ብሔረሰቦችና ህዝቦች የጋራ ቤት መሆኗን የአዲስ አበባ ከተማ አስተዳደር ከንቲባ አዳነች አቤቤ ገለጹ፡፡
የአዲስ አበባ ከተማ አስተዳደር 20ኛዉን የኢትዮጵያ ብሄሮች፤ ብሔረሰቦችና ህዝቦች ቀንን በከተማ ደረጃ በአራዳ ፓርክ በተለያዩ መርሃ ግብሮች አክብሯል፡፡
በመርሃ ግብሩ ላይ ከንቲባ አዳነች አቤቤን ጨምሮ አፈ ጉባኤ አገኘሁ ተሻገር፣ የአዲስ አበባ ምክር ቤት አፈ ጉባኤ ቡዜና አልከድር ፣ የህዝብ ተወካዮች ምክር ቤት ምክትል አፈ ጉባኤ ሎሚ በዶ ፤ ሌሎች ከፍተኛ የመንግስት ስራ ሃላፊዎች እና በመዲናዋ የሚኖሩ የተለያዩ ብሄር ብሄረሰቦች ተወካዮች ተገኝተዋል፡፡
በመርሃ ግብሩ ላይ የተገኙት የአዲስ አበባ ከተማ አስተዳደር ከንቲባ አዳነች አቤቤ አዲስ አበባ በኢትዮጵያ ብሔር ብሔረሰቦች እና ህዝቦች በጋራ የተገነባች የብዝሀነትና የውበት መገለጫ እንዲሁም የሁላችንም ቤት ናት ብለዋል።
አዲስ አበባ ከተማ የጋራ ማንነትን በማፅናት፣ በመማማርና በመተማመን ጠንካራ አብሮነትን መገንባት ላይ ተጠናክሮ እንደሚቀጥል ከንቲባዋ አረጋግጠዋል።
ያለፉት የለውጥ አመታትን ተከትሎ በከተማዋ የተተገበሩት ሁሉን አካታች ልማትና የመልካም አስተዳደር ስራዎች ብዝሀነትን ባከበረና እኩል ተጠቃሚነትን ባረጋገጠ መልኩ ተደራሽ መሆኑን ጠቁመዋል።
በቀጣይም በከተማዋ የሚሰሩ የልማትና የመልካም አስተዳደር ስራዎች ሁሉን አካታችነትና እኩል ተጠቃሚነትን በሚያረጋግጥ መንገድ በሁሉም መስክ ተጠናክረው እንደሚቀጥሉ ከንቲባዋ ተናግረዋል፡፡
በሔለን ተስፋዬ
