ሞባይል ስልክ ቀምቶ ወንዝ ውስጥ የገባን ተጠርጣሪ ተከታትሎ በቁጥጥር ስር ማዋሉን የአዲስ አበባ ፖሊስ ጠቅላይ መምሪያ አስታወቀ፡፡
ተከሳሽ ካሊድ አህመድ የሞባይል ስልክ ቅምያ ወንጀል በመፈጸም በቦሌ ክፍለ ከተማ ወረዳ 3 ልዩ ቦታው ኢምፔሪያል ድልድይ አካባቢ ነው።
አንድ ግለሰብ በአካባቢው መንገድ ላይ እየተንቀሳቀሰ ሳለ ተጠርጣሪ ካሊድ አህመድ በፍጥነት ቀርቦ ሞባይሉን ቀምቶ ለመሰወር ሲሞክር በወቅቱ በወንጀል መከላከል ስራ ላይ በነበሩ የአደይ አበባ ስታዲየም አካባቢ ፖሊስ ጣቢያ የወንጀል መከላከል አባላት ዓይን ውስጥ ገብቷል።
የፖሊስ አባላቶቹም ተጠርጣሪውን በቁጥጥር ስር ለማዋል ባደረጉት ብርቱ ክትትል ተከሳሽ ወደ ውሀ መውረጃ ድልድይ ውስጥ ገብቶ ቢደበቅም ከአንድ ሠዓት በላይ በፈጀ ፍለጋ ሊያዝ መቻሉን ፖሊስ ገልጿል።
ፖሊስም ተጠርጣሪውን በቁጥጥር ስር በማዋል ምርመራ የማስፋት ተግባሩን አጠናክሮ መቀጠሉን አስታውቆ ክስ ተመስርቶበታል ።
ህዝባዊ ፖሊስ ምን ጊዜም አስፈላጊውን መስዋዕትነት በመክፈል ለህግ የበላይነት መስፈን እንደሚቆም ያስታወቀው የአዲስ አበባ ፖሊስ ጠቅላይ መምሪያ ህብረተሰቡ ለወንጀል ፈጻሚዎች ምቹ በሆኑ አካባቢዎች በቂ ጥንቃቄ ማድረግ እንዳለበት ለኤኤምኤን በላከዉ መረጃ መልዕክቱን አስተላልፏል።
