የአዲስ ካፒታል እቃ ፋይናንስ ንግድ ስራ አ.ማ የብዙዎችን ህይወት የቀየረ እና በግብዓት አቅርቦት መፍትሄ ሰጪ ተቋም መሆኑን የአዲስ አበባ ከተማ ምክትል ከንቲባ እና የኢንዱስትሪ ልማት ቢሮ ኃላፊ አቶ ጃንጥራር አባይ ገለጹ
የአዲስ ካፒታል እቃ ፋይናንስ ንግድ ስራ አ.ማ ለከተማዋ ልማት ሚና እንደሚጫወት ታምኖበት ከ11 ዓመታት በፊት በ500 ሚሊየን በተፈቀደ ካፒታል እና በ200 ሚሊየን የተከፈለ ብር ስራ የጀመረ ተቋም ነው፡፡
ተቋሙ ለኢንዱስትሪ ልማት ስኬታማነት እና ማበብ ለቴክኖሎጂ መላመድ እና ስራ ፈጠራ ልቀትን ከማሳደግ አንጻር ታልሞ የተቋቋመ ስትራቴጂክ ተቋም ነው፡፡ በየዓመቱ እድገትን እያሳየ የመጣው ተቋሙ ባለ 11 ወለል ዘመናዊ ህንጻን አስመርቋል፡፡
የአዲስ አበባ ከተማ ምክትል ከንቲባ እና የኢንዱስትሪ ልማት ቢሮ እንዲሁም የአዲስ ካፒታል እቃ ፋይናንስ ንግድ ስራ አ.ማ የቦርድ ሰብሳቢ አቶ ጃንጥራር አባይ የአዲስ ካፒታል እቃ ፋይናንስ ንግድ ስራ አ.ማ የብዙዎችን ህይወት የቀየረ እና ግብዓት አቅርቦት ላይ መፍትሄ ሰጪ ተቋም መሆኑን ያስመሰከረ ነው ብለዋል፡፡
ተቋሙ ለበርካታ የጥቃቅን፣አነስተኛ እና መካከለኛ ኢንተርፕራይዞች ዘመናዊ መሳሪያዎችን በማቅረብ ስራቸውን እንዲያስፋፋ፣ምርታቸውን እዲያሳድጉ እና የስራ እድል እንዲፈጥሩ ማስቻሉንም ምክትል ከንቲባው አቶ ጃንጥራር ገልጸዋል፡፡
አቶ ጃጥራር አክለውም አክሲዮን ማህበሩ የምግብ ዋስትናን ከሚያሳድጉ ማሽነሪዎች ጀምሮ በከተማ ውስጥ ለሚገነቡ የመሰረተ ልማቶች ውስብስብ የግንባታ ማሳሪያዎችን ጨምሮ አስፈላጊውን ማሳሪያዎች እንዲያገኙ እየረዳ ነው ብለዋል፡፡
አዲስ ካፒታል እቃ ፋይናንስ ንግድ ስራ አ.ማ ያስገነባው ህንጻ 1360 ካሬሜትር ላይ ያረፈ መሆኑን እና ከተያዘለት ቀን ቀድሞ የተጠናቀቀ መሆኑን የገለጹት ደግሞ የተቋሙ ዋና ስራ አስፈጻሚ አቶ መሳይ እሰኔ ናቸው፡፡
ተቋሙ በቀጣይነት ለሚያከናውናቸው ስራዎች ከከተማ አስተዳደሩ አስፈላጊው ድጋፍ እንደሚያደርግለት ተመላክቷል፡፡
በሃብታሙ ሙለታ
