የቀድሞው የኢትዮጵያ ሥራ አመራር ኢንስቲትዩት ጠንካራ የሪፎርም ትግበራዎችን ወደ ለውጥ በማሸጋገር ለቀጣይ ተልዕኮው መዘጋጀቱን አስታወቀ::
ይህንንም ሪፎርም ምክንያት በማድረግ ስያሜውን በይፋ ወደ ኢትዮጵያ ብቃትና ሥራ አመራር ኢንስቲትዩት ሲሆን ፣የመንግስት ሠራተኞችን የመመዘን፣ ስልጠና የመስጠትና ተቋማትን የማማከር አዲስ ተልዕኮዎች ተሰጥቶታል።
የኢትዮጵያ ሲቪል ሰርቪስ ኮሚሽን ኮሚሽነር መኩሪያ ኃይሌ (ዶ/ር) እንደገለጹት፣ ኢንስቲትዩቱ በቀደሙት ዓመታት የዘመነ ቢሆንም በአሁኑ ወቅት ግን ወደኋላ የቀረና በዝቅተኛ አፈጻጸም ላይ ይገኛል።
አዲስ ከተቋቋሙ እና በአጭር ጊዜ ለውጥ እያስመዘገቡ ካሉ ተቋማት ጋር ሲነፃፀር፣ የኢንስቲትዩቱ ኃላ የቀረ በመሆኑ ስር ነቀል የሪፎርም ሥራ መጀመርን የግድ አድርጎታል።
ኮሚሽነር መኩሪያ (ዶ/ር) እንደገለፁት፣ ሪፎርሙ ሰራተኛን ለመቀነስ ያለመ ሳይሆን፣ መንግስት ለሁሉም ሰራተኛ ከፍተኛ በጀት መመደቡና የደመወዝ ጭማሪ ማድረጉ የዚህ ማሳያ ነው።
ይሁን እንጂ፣ ኢትዮጵያ ከመንግስት ሠራተኞች አያያዝ አንፃር ከዓለም ኋላ ቀር በመሆኗ፣ አገሪቱን ተወዳዳሪ ለማድረግ የሪፎርም ትግበራ መረጋገጥ አስፈላጊ መሆኑን አስምረውበታል።
በተከናወነው ሪፎርም መሰረት፣ የኢትዮጵያ ብቃትና ሥራ አመራር ኢንስቲትዩት ቀጣይ ተልዕኮው ብቃት የመመዘን፣ ስልጠና የመስጠት እና ተቋማትን የማማከር አገልግሎት የሚሉ ዋና ዋና ተልዕኮዎችን የሚይዝ ሲሆን፣ በአዋጅ ቁጥር 1353/2017 መሠረት የሚሰራ ይሆናል።
የኢትዮጵያ ሲቪል ሰርቪስ ኮሚሽንም ለአዲሱ ኢንስቲትዩት ያልተቆጠበ ድጋፍ እንደሚያደርግ ቃል ገብቷል።
የኢትዮጵያ ብቃትና ሥራ አመራር ኢንስቲትዩት ዋና ዳይሬክተር አቶ ደሳለኝ ጣሰው፣ ኢንስቲትዩቱ የዕድሜውን ያህል ከወቅታዊ ተለዋዋጭ ሁኔታዎች ጋር ራሱን እንዳላራመደ ጠቅሰዋል።
በአሁኑ ወቅት ግን ተለዋዋጭ ሁኔታዎችን ያገናዘበ፣ የኢኮኖሚ፣ የዕውቀትና የቴክኖሎጂ ዕድገትን ያማከለ የሪፎርም ሥራ ተግባራዊ መደረጉን ገልጸዋል።
በሲቪል ሰርቪስ ኮሚሽን ድጋፍ የተሰራው ጠንካራ ሪፎርም የቀደሙ ፈተናዎችን ወደ ዕድል ለመቀየር ያለመ መሆኑንም አስታውቀዋል።
የቀድሞው የኢትዮጵያ ሥራ አመራር ኢንስቲትዩት በ1949 ዓ.ም የተቋቋመ አንጋፋ ተቋም መሆኑን መረጃዎች ያመለክታሉ።
በምትኩ ተሾመ
