AMN ህዳር 20/2018 ዓ.ም
ጠቅላይ ሚኒስትር ዐቢይ አሕመድ ዶ/ር ስልጣኔን፣ ዘመናዊነትን እና ታሪክን በአግባቡ መገንዘብ ዛሬን ለመስራት እና ለነገ የተሻለ እቅድ ለመተግበር ወሳኝ መሆኑን ገለፁ።
ይህን የገለፁት ለብልፅግና ፓርቲ ከፍተኛ አመራሮች ለአስር ቀናት ሲካሄድ በቆየው ስብሰባ መጠናቀቂያ መርሃ ግብር ላይ ሲሆን፣ የመደመር መንግስት የስራ እንዴት መከወን እንዳለበት በማስረዳት ነው።
በመድረኩ ላይ መርህ የሆነውን የመደመር መንግስትን ምንነት፣ አላማ እና የሚከተላቸውን ቁልፍ መርሆች በሰፊው አብራርተዋል።
የመደመር መንግስት የሚመራባቸውን አራት ወሳኝ ነጥቦች ሲያብራሩም “መፍጠር፣ መፍጠን፣ ማብዛት እና ማጥራት” በሚሉት ላይ ትኩረት ሰጥተዋል።
ከእነዚህ ውስጥ የመጀመሪያውን “መፍጠር” ሲያብራሩ፣ ብዙ ያልተፈጠረ ነገር ጥራት ማረጋገጥ እንደማይችል ገልፀው፣ ጥራት ያለው ውጤት የሚገኘው ከብዙ ፈጠራዎች ውስጥ በመምረጥ እንደሆነ አስረድተዋል።
ብዙ በመፍጠር እና በመሮጥ መካከል ጥቂቶቹ ለረጅም ጊዜ የሚቆዩ እና ጥራታቸው የተጠበቀ ሆነው ለመውጣት ይረዳሉ ብለዋል።
በመሆኑም ማብዛት እድል ሲሆን፣ ጥራት ግን ውጤት ነው በማለት ከላይ የተነሱ ነጥቦችን ጥቅም አስረድተዋል።
ጠቅላይ ሚኒስትሩ የገለፃቸው ዋና ነጥቦች በሁለት ቁልፍ ጉዳዮች ዙሪያ እንደሚያጠነጥኑ ጠቁመዋል።
የመጀመሪያው እሳቤ ስልጡንነት፣ ዘመናዊነት እና ኋላ ቀርነት እንዴት እንደተፈጠሩ ታሪካዊ ዳራቸውን በመመልከት፣ ከነሱ ልምድ መውሰድ ላይ ያተኮረ ነው።
ኢትዮጵያ በዘመናት ውስጥ ከዘመኑ መነጠል እና ወደኋላ መቅረት የደረሰባትን ችግር፣ ከአለም አቀፍ ሁኔታዎች ጋር በማያያዝ ገለፃ ሰጥተዋል።
በዚህም መሰረት ስልጣኔን፣ ዘመናዊነትን እና ታሪክን በትክክል ካልተገነዘብን ዛሬን ለመስራት እና ነገ የምናስበውን ለመከወን እንደሚያስቸግር አስምረውበታል።
ሁለተኛው ቁልፍ ጉዳይ ደግሞ ከመደመር መርህ በመነሳት ስልጡን አገር እንዴት መፍጠር ይቻላል የሚል እንደሆነ ተናግረዋል።
ይህ ነጥብ የመደመር መንግስት የሚያጠነጥንባቸው አራቱ ወሳኝ እሳቤዎች ማለትም መፍጠር፣ መፍጠን፣ ማብዛትና ማጥራትን ተግባራዊ በማድረግ፣ ስልጡን እና ዘመናዊት ኢትዮጵያን ለመፍጠር ያግዛል ብለዋል።
ይህም በኮሪደር ልማት መጀመሪያና አሁን ባለው እሳቤ መካከል ያለውን ልዩነት በማሳየት የአራቱን ወሳኝ እሳቤዎች በእጅጉ አስፈላጊ መሆናቸውን አመላክተዋል።
በሄለን ተስፋዬ
