አዲስ ሚዲያ ኔትዎርክ

AMN- መጋቢት 11/2018 ዓ.ም

የመስጂድ ሕንፃዎች ከጸሎት ስፍራነታቸው ባለፈ፤ የጥበብ፣ የታሪክ እና የባህል መገለጫዎች ናቸው። በዓለም ዙሪያ የሚገኙ አንዳንዶቹ መስጂዶች ደግሞ ከማንኛውም ሕንፃ በተለየ መልኩ በአይነታቸው ልዩ፣ በሚያስደምም ሥነ-ሕንፃቸው እና በአስገራሚ ታሪካቸው የሰውን ልጅ ቀልብ ይስባሉ።

1447ኛውን የኢድ አል-ፈጥር በዓል ምክንያት በማድረግ፣ በዓለም ላይ ካሉ በሚሊዮን የሚቆጠሩ መስጂዶች መካከል እጅግ አስደናቂ የተባሉትን አምስት መስጂዶች እንደሚከተለው አቅርበንላችኋል።

1.መስጂደል ሐራም (ታላቁ መስጂድ) – መካ፣ ሳውዲ አረቢያ

ይህ መስጂድ በአንድ ቃል ይገለጻል፦ “ግዙፍነት”። በዓለም ትልቁ መስጂድ ሲሆን፣ በሙስሊሞች ዘንድ እጅግ ቅዱስ ስፍራ የሆነውን ካዕባን በውስጡ ይዟል።

ከ4 ሚሊዮን በላይ ምዕመናንን በአንድ ጊዜ ማስተናገድ የሚችለው ይህ መስጂድ፣ የ24 ሰዓት እንቅስቃሴ ያለበት፣ በቴክኖሎጂ የረቀቀና የእስልምና እምነት ማዕከል ነው።

2. ሼክ ዛይድ ግራንድ መስጂድ – አቡ ዳቢ፣ የተባበሩት አረብ ኤምሬቶች

የንፅህና እና የቅንጦት መገለጫ የሆነው ይህ መስጂድ ከነጭ እብነበረድ (marble) የተገነባ ሲሆን፣ 82 ጉልላቶች እና ከ1000 በላይ አምዶች አሉት። በውስጡ በዓለም ትልቁን በእጅ የተሠራ ምንጣፍ እና ግዙፍ የክሪስታል ቻንደሊየሮችን (chandeliers) ይዟል። የመስጂዱ ውበት በቀን ብቻ ሳይሆን፣ በሌሊት በሚፈነጥቀው ልዩ የብርሃን ነጸብራቅ ይበልጥ ይደምቃል።

3. የጀኔ ታላቅ መስጂድ (Great Mosque of Djenné) – ጀኔ፣ ማሊ

ይህ መስጂድ “የዓለም ትልቁ ከጭቃ የተገነባ ሕንፃ” በመባል ይታወቃል። በ13ኛው ክፍለ ዘመን የተገነባ ሲሆን፣ በምዕራብ አፍሪካ የሱዳኖ-ሳሄሊያን ሥነ-ሕንፃ ጥበብ ዋነኛ ማሳያ ነው። የሚገርመው ነገር፣ የመስጂዱን ግድግዳ ለማደስ በየዓመቱ የከተማዋ ነዋሪዎች በሙሉ በበዓል ድምቀት ተሰብስበው አዲስ ጭቃ ይቀቡታል። ይህ ተግባር ማህበረሰባዊ ትስስሩን እና ባህሉን ሕያው አድርጎ እንዲቀጥል አስችሎታል።

4. ሰልጣን አህመድ መስጂድ (ሰማያዊው መስጂድ) – ኢስታንቡል፣ ቱርክ

ይህ መስጂድ የኦቶማን እና የባይዛንታይን ሥነ-ሕንፃ ውህደት ውጤት ነው። “ሰማያዊ መስጂድ” የሚለውን ስያሜ ያገኘው፣ በውስጠኛው ክፍል በሚገኙ ከ20,000 በላይ በሚሆኑ በእጅ የተሠሩ ሰማያዊ የሸክላ ሰሌዳዎች (tiles) ምክንያት ነው። ስድስት ሚናራዎች (minarets) ያሉት ሲሆን፣ የኢስታንቡል ታሪካዊ ገጽታ ዋነኛ መለያና ምልክት ነው።

5. ክሪስታል መስጂድ (Crystal Mosque) – ቴሬንጋኑ፣ ማሌዢያ

ይህ መስጂድ ሙሉ በሙሉ የተገነባው ከብረት፣ ከብርጭቆ እና ከክሪስታል ነው። በዋን ማን ደሴት (Wan Man Island) ላይ የሚገኝ ሲሆን፣ በውሃ ላይ ያረፈ መስጂድ ነው። በቀን የፀሐይ ብርሃንን በማንጸባረቅ፣ በሌሊት ደግሞ በሚያማምሩ ባለቀለም መብራቶች በመታገዝ እንደ ዕንቁ ያበራል።

እናንተስ በኢትዮጵያ ከሚገኙ መስጂዶች መካከል አስገራሚ የምትሉት የትኛውን ነው? መረጃችሁን በኮሜንት አጋሩን!

በያለው ጌታነህ