Afrikaan dhaabattee taajjabuu keessaa baatee gara murtoo kennuutti akka ceetu taasisuuf kaayyoo tokkoon socho’uun akka barbaachisu Ministirri Muummee FDRI Abiyyi Ahimad (PhD) hubachiisaniiru.
Dooktar Abiyyi Yaa’ii Hoggantoota Biyyoota Miseensa “COMESA” 24ffaa, Keeniyaa, Naayiroobiitti adeemsifamaa jiru irratti hirmaataa jiru.
Haasaa waltajjii kana irratti taasisaniin, yeroon kun kan Afrikaan dhaabbattee taajjabdu akka hin taane kan kaasuun “Egeree haqummaan itti mirkanaa’e ijaaruu kan danda’amu kalaqaafi qabeenya uumama qabnuufi tattaaffii keenya walitti fiduun kaayyoo waloof socho’uudhaan qofa” jedhaniiru.
Dhaabbileen naannawaa akka COMESA milkaa’ina kanaaf akka hojjachuu qaban dhaamaniiru.
Xiyyeeffannoon baranaa Dijitaalaayizeshinii diinagdee irratti ta’uun waqtichaa wajjin kan deemu ta’uu eeruun seenaa diinagdee Afrikaa irra deebiin barreessuuf akka carraa uumu ibsaniiru.
Diinagdee Dijitaalaa mirkaneessuun lammiileen haala amansiisaan kaffaltii akka raawwatan, tajaajila akka salphaatti akka argataniifi daangaa qaxxaamuranii akka waliin hojjatan dandeessisa, bu’uuraalee misoomaa Dijitaalaa ijaaruu of keessatti akka hammatu eeraniiru.
Mul’ata kanas Karoora Biyyaalessaa keessa galchuun, “Itoophiyaa Dijitaalaa 2025″tiin gara hojiitti jijjiiraa jirraachuu ibsan.
Tajaajiloota uummataa Dhibbaan lakkaa’aman gama dijitaalaan kennuun dhaqqabummaa dabaluurra darbee gufuuleefi rakkoo hoj-maataa maqsuun akka danda’ame illee ibsaniiru.
Hubannoo Nam-tolchee (AI) fi Sagantaa Koodiingii biyyaalessaan dargaggoota Itoophiyaa Miliyoona 2 fi Kuma 200 caalan leenjii addunyaa ammayyaa’aa jirtu wajjin isaan deemsisuu danda’u fudhachuu dubbataniiru.
Kalaqni Dijitaalaa daangaa hin beeku kan jedhan Ministirri Muummee Abiyyi Ahimad (PhD) tarkaanfiin itti aanu akka biyyoota naannootti carraaqqiiwwan kanneen walitti fiduun hojjechuu akka ta’e dubbataniiru.
Milkaa’ina isaafis Itoophiyaan biyyoota ollaa wajjin hojjachuuf qophii ta’uu himaniiru.
Malkaamuu Abbabaatiin
