20ኛዉ የኢትዮጵያ ብሔሮች ብሔረሰቦች እና ህዝቦች ቀን “ዴሞክራሲያዊ መግባባት ለህብረብሔራዊ አንድነት ” በሚል መሪ ቃል እየተከበረ ይገኛል፡፡
ከህዳር ወር መግቢያ ጀምሮ በአዲስ አበባ ከተማ በሚገኙ የተለያዩ ክፍለ ከተሞች እና ተቋማት በድምቀት ሲከበር የቆየው 20ኛው የኢትዮጵያ ብሔሮች ብሔረሰቦች እና ህዝቦች ቀን የማጠቃለያ መርሀ ግብር በአራዳ ፓርክ በተለያዩ መርሃ ግብሮች ተካሄዷል።
በመርሃ ግብሩ ላይ ንግግር ያደረጉት የአዲስ አበባ ምክር ቤት አፈ ጉባኤ ወሮ ቡዜና አልከድር በከተማዋ የተሰሩ ዘርፈ ብዙ ስራዎች የከተማዋን መጻኢ እድል መወሰን የሚችሉ ናቸው ብለዋል።
በመዲናዋ ባለፉት ሰባት የለውጥ አመታት በአመራሩ ቁርጠኝነትና በህዝብ ተሳትፎ በተሰሩት ዘርፈ ብዙ ስራዎች አዲስ የለውጥ ፋና መፈጠንቁ እና የማይፋቅ ደማቅ አሻራ ማኖር መቻሉን ገልጸዋል።
በዚህ ሂደት የከማዋን ህዝብ ማህበራዊ እና ኢኮኖሚያዊ ችግሮች መፍታት መቻሉን እና ማህበራዊ አብሮነትን የሚያጎለብቱ የተቀናጁ የልማት ስራዎች መሰራታቸዉን ጠቁመዋል፡፡
በመዲናዋ የተሰሩ የልማት እና ማህበረሰብ አቀፍ ስራዎች ህጻናትና ሴቶችን ጨምሮ ወጣቶችን፣ አቅመ ደካሞች እና ወጣቶችን ተጠቃሚ ከማድረጋቸዉም በላይ የማህበረሰቡን አኗኗር ያዘመኑ መሆኑን በመጥቀስ የተጎሳቆሉ መንደሮች ለምተው ከተማዋን ልክ እንደ ስሟ አዲስ አድርገዋታል ብለዋል።
የወንዝ ዳር እና የተፋሰስ ልማት ስራዎች፣ የአረንጓዴ አሻራ የችግኝ ተከላ መርሃ ግብር እና የተፈጥሮ ሃብት ጥበቃ ስራዎች የከተማዋን መጻኢ እድል መወሰን ከሚችሉ በርካታ ስራዎች መካከል ናቸው ብለዋል።
በተጨማሪም ግልጽነት እና ተጠያቂነት የሰፈነበት የሲቪል ሰርቪስ ተቋማት መገንባት መቻሉ ከተማዋን የሚመጥን እና የ ህዝቡን እንግልት ያስቀረ ስራ መሆኑን ጠቅሰዋል።
ዝቅተኛ ገቢ ያላቸውን የህብረተሰብ ክፍሎች ለመደገፍ የበጎነትን ባህል እንዲስፋፋ የከተማ አስተዳደሩ የሰጠው ግልጽ ውሳኔ ሰጪነት፤በተግባር መገለፁ ከፍተኛ ህዝባዊ ተቀባይነት ማግኘቱንም አፈ ጉባዔዋ ጨምረዉ ተናግረዋል።
ፍሬህይወት ብርሃኑ
