Komishiniin Qindeessaa Hirmaannaa Ummataa fi Tola Ooltummaa Bulchiinsa Magaalaa Finfinnee, Miseensota Waldaa Hojjattoota Komishinii Gamtaa Afrikaa waliin ta’uun biqiltuu Ashaaraa Magariisaa dhaaban.
Dhaabbiin biqiltuu kun kan gaggeeffame magaalaa Finfinnee, naannoo Beellaa 18 Maazoriyaa jedhamuun beekamutti.
Akka Pireezidaantiin Waldaa Hojjetoota Komishinii Gamtaa Afrikaa Nuhu Chiyam jedhanitti; Jijjiiramni qilleensaa akka addunyaatti miidhaa guddaa geessisaa jira.
Biqiltuu dhaabuun rakkoo jijjiirama qilleensaatiin dhufu itti fufiinsaan ittisuuf furtuu akka tahe kan himan Pireezidaantichi, kanaan walqabatee bu’aan Sagantaa Ashaaraa Magariisaa galmeesse fakkeenyummaa kan qabu ta’uu ibsaniiru.
Komishinarri Komishinii Qindeessaa Hirmaannaa Hawaasaa fi Tola Ooltummaa Bulchiinsa Magaalaa Finfinnee Yimar Kabbadaa gama isaaniin dhaabbiin biqiltuu har’aa kun xiyyeeffannoo Itoophiyaan dhimmichaaf kennite agarsiisuuf carraa akka tahe ibsaniiru.
Kunis maqaa gaarii Itoophiyaa ijaaruu keessatti gahee guddaa akka qabu ibsuu isaanii Tajaajilli Oduu Itoophiyaa gabaaseera.
