Jenevaatti mariin dhiibbaa pilaastiskaa hir’isuu irratti xiyyeeffatee guyyaa 10’f adeemsifamaa ture waliigaltee tokko malee xumurameera.
Bara Faranjootaa 2022tti Dhaabbata Mootummoota Gamtoomanitti Sagantaa Eegumsa Naannoo jalatti Senegaal Daakaaritti yaadi isaa dhiyaatee Uraagaayitti mariin isaa eegalame yeroo 5 mariin isaa adeemsifamuyyuu hanga ammaatti waliigaltee waloo irra gahuu dhabuun gudunfaa hin arganne.
Waliigaltichi bara 2025 tti yaada gudunfaa argata jechuun Siwiizarlaand Jenevaatti adeemsifamaa guyyaa 10’f turullee waliigaltee irra gahuu dhabuun hirmaattota biratti komii kaaseera.
Waliigaluu dhabuu isaaniif yaadotni wixinee haaraa gahee isaanii ba’achuu Rooyitarsi gabaaseera.
Yaadi wixinee oomishaalee pilaastikaa daangessu, keemikaalotaa fi qabiinsa meeshaalee dhabamsiifamanii, irra deebiin fayyadamuu fi deggarsa biyyoota guddataa jiranii irratti ejjennoo dadhabaa kan qabatedha jechuun biyyoota gidduutti waliigalteen dhabaneera.
Liyaat Kaasaahutiin
