Bulchiinsi Magaalaa Finfinnee gaaffii mana jireenyaa hojjettoota mootummaa magaalaa Finfinneetti argamanii deebisuuf Korporeeshinii Misooma Manneenii Magaalaa Finfinneefi Baankii Daldala Itoophiyaa waliin walii galtee mallatteesseera.
Walii galtichas Hooggantuun Biiroo Misoomaafi Bulchiinsa Manneenii Magaalaa Finfinnee Aaddee Qiddist W/Giyoorgisiifi Pirezidaantiin Baankii Daldala Itoophiyaa Obbo Abbee Saanoo Mallatteessaniiru.
Hooggantuun Biiroo Misoomaafi Bulchiinsa Manneenii Magaalaa Finfinnee Aaddee Qiddist W/Giyoorgis akka ibsanitti walii galtichi Bulchiinsi Magaalaa Finfinneefi Baankiin Daldala Itoophiyaa sagantaa 25/75 jedhuun hojjettoonni mootummaa Pirojektii Misooma Manneennii waloon misoomsuuf kan kaayyeffate ta’u eeraniiru.
Akkaataa walii galtichaatiin hojjetaan mootummaa gatii manichaa keessaa harka 25 erga qusatee booda harka 75 Baankii Daldala Itoophiyaarraa liqiin fudhatee ijaaruun hojjettoonni waggoota 20 keessatti akka kaffalan kan dandeessisuudha.
Walii galtichi rakkoo mana jireenyaa hojjettoota mootummaa kan deebisu ta’uun himameera.
Pirezidaantiin Baankii Daldala Itoophiyaa Obbo Abbee Saanoo dhiheessiin lafaafi dhimmoonni biroon saffisan yoo raawwataman ijaarsicha waggoota sadii keessatti ni xumurra jedhaniiru.
Manni ijaaramus hojjetoota mootummaa kuma 41 ta’aniif akka ta’es himameera.
Carraa mana jireenyaa dursa kan argatan barsiisota magaalaa Finfinnee waldaan ijaaramanii haal duree warreen xumuran ta’uunis ibsameera.
Adeemsaan hojjettoonni mootummaa magaalaa Finfinneefi mootummaa Federaalaa kanneen biroo mana jireenyaa hin qabne fayyadamaa sagantichaa akka ta’an himameera.
Mitikkuu Tashoomaan
