Gareen Wal’aansa Fayyaa Hospitaala Ispeeshaalaayizdii Alart Waajjira Addis Miidiyaa Neetwork AMN’tti argamuun tajaajila tola ooltummaa gannaa bilisaan hojjattootaaf kennee jira.
Hospitaalichi bara 2015 tajaajila tola ooltummaa eegaluun lammiilee kuma 180 ol qaqqabsiisuu isaa Hoogganaan Fayyaa Maatii fi Hawaasaa Hospitaalichaa Dr. Biyaadgilinyi Axinaafuu dubbataniiru.
Hojjettoota dhaabbilee adda addaa dabalatee lammiilee yeroo dheeraaf mana keessatti hojiin dabarsan dhaqqabuudhaan lammiilee gahumsaa fi bu’aa qabeessa ta’an oomishuuf tajaajila kennamaa jiru akka ta’e himaniiru.
Gareen tola ooltummaa kun AMN’itti argamuunis wal’aansa ilkaanii, gogaa, ijaa fi dhibeewwan
keessoo bilisaan kennuudhaan itti gaafatamummaa hawaasummaa isaa ba’achuu ibsaniiru, Dr. Biyaadgilinyi.
Tajaajilatola ooltummaa kanarratti ogeeyyiin fayyaa soddoma ol kan hirmaatan yoo ta’u, hanga ammaatti ogeeyyiin fayyaa dhaabbatichaa kuma lamaa ol tajaajila tolaooltummaa gannaa kana irratti hirmaachuu akka danda’an beekameera.
Daayirektarri Bulchiinsaa fi Misooma Humna Namaa AMN Obbo Asraat Garramaw tajaajila ogeessonni kunneen kennan hojjetaa fayyaalessa qabaachuuf kan gargaaru ta’uu himan.
Kana malees yeroo hojjattootni gara dhaabbilee fayyaa adeemuun qisaasessan qusata jedhaniiru.
Hojjattootni AMN 500 caalanis tajaajila bilisaa kanarraa fayyadamoo akka ta’an ibsaniiru.
Hospitaalli Alart gumaacha AMN’f taasiseef kan galateeffatan Obbo Asiraat, gara fuulduraattis dhaabbaticha waliin ta’uun hojjattoonni yoo danda’ame ji’a jaha jahaan qorannoo fayyaa akka taasisaniif haala mijeessuuf kan hojjetu ta’uu ibsaniiru.
Mikaa’el Hiruy’tu gabaase
