Mootummaan bara kana bittaa xaa’oo biyyoof birrii Biiliyoona 84 deeggarsa taasisuu Ministirri Ministeera Qonnaa.Girmaa Amantee (Dr.) ibsan.
Bara bajaataa kana xaa’oo biyyoo kuntaala miiliyoona 24 dhiyeessuuf hojjatamaa jiraachuus kaasaniiru.
Ministirri Ministeera Qonnaa Girmaa (Dr.) addatti turtii AMN PLUS Sagalee Dhalootaa waliin taasisaniin, mootummaan tarkaanfiwwan fooyya’insaa damee qonnaarratti fudhateefi deeggarsa faayinaansii taasisaa jiruun bu’aan argaman Jira jedhan.
Tarkaanfiwwan fudhataman kanan lafti kilaastaran qotamu heektaara kuma 300 irraa yeroo ammaa gara heektaara miiliyoona 11.8tti akka ol guddate himan.
Jijjiiramaan dura misoomni qamadii jal’isii bonee lafa heektaara 3500 yoo ta’u,bara kana haga ammaatti lafti heektaarri miiliyoonni 3.5 misoomu Girmaan (Dr.) eeran.
Qonna gannaafi jal’isiin barana oomisha qamadii kuntaala miiliyoona 300 ni eegama jedhan.
Omishni kunis kan bara darbee kuntaala miiliyoona 70 ni caala jedhameera.
Sagantaa maaddii guutuun hojiileen hojjatamaa jiran milkaa’ina galmeessaa jiru kan jedhan Girmaan (Dr.), barana cuucii lukkuu miiliyoona 150 omishuuf hojjatamaa jiraachuu dubbataniiru.
Hanga baatii Guraandhala darbeettis cuucii miiliyoonni 85 omishamu himan.
Guddataa Ajjamaatu gabaase
