Geejjibaa fi loojistiksiin Galaana Itoophiyaa, Poolisii Federaalaa Itoophiyaa waliin ta’uun, miseensota Poolisii Eegdota qarqara Galaanaa Hidha Haaromsa Guddicha Itoophiyaa’tti bobbaafaman ogummaawwan bu’uuraa galaanaatiin leenjisee eebbiseera.
Sagantaa Akkaadaamii Humna Galaanaa fi Loojistiksii Baabboogaayyaatti gaggeeffame kana irratti Komishinarri Jeneraalaa Poolisii Federaalaa Dammallaash Gabramikaa’el, Hojii Gaggeessaa Olaanaa Geejjiba Galaanaa fi Loojistiksii, Bariisoo Amaloo (Dr), fi qondaaltonni olaanoo poolisiifi mootummaa kanneen biroo argamaniiru.
Komishinarri Jeneraalaa Poolisii Federaalaa Dammallaash Gabramikaa’el, leenjichi istaandaardii idil-addunyaa eegee akka kenname beeksisaniiru.
Hidhi Haaromsa Guddichi Itoophiyaa Adawaa Lammaffaa Itoophiyaanotaa ta’uu eeruun Poolisiin Federaalaa fi Raayyaan Ittisa Biyyaa hidhichi erga ijaaramuu jalqabee kaasee eegaa akka ture addeessaniiru .
Hojii Gaggeessaan Geejjiba Galaanaa fi Loojistiksii Itoophiyaa Bariisoo Amaloo (Dr.) gama isaaniitiin dhaabbatichi guddina diinagdee biyyaa keessatti gumaacha olaanaa taasisaa akka jiru dubbataniiru. Akkaadaamichi namoota galaanarra hojjatan leenjisuun gara biyyoota addunyaa biroottti akka bobbaasaa jiru ibsuu isaanii TOI’tu gabaase.
