በተባበሩት መንግስታት የአየር ንብረት ለዉጥ ማዕቀፍ መሰረት ኢትዮጵያ 32ኛውን የፓርቲዎች ጉባኤ (ኮፕ-32)ን ለማዘጋጀት መመረጧ የአየር ንብረት ለውጥን ለመግታት ላበረከተችው ከፍተኛ አስተዋጽኦ ዕውቅና የሚሰጥ ነዉ ሲል የመንግስት ኮሙኒኬሽን አገልግሎት አስታወቀ፡፡
ይህ ዉሳኔ በጠንካራ የዲፕሎማሲ ጥረት የተገኘ ዕድል በመሆኑ ኢትዮጵያ የአየር ንብረት ለውጥን በመከላከልና በመቆጣጠር ሂደት ዉስጥ የመሪነት ሚናዋን በተግባር እንድታሳይ የሚያግዝ ከመሆኑም በላይ፣ የጉባዔዉ ዝግጅት ኢትዮጵያን እንደ ተሳታፊ ብቻ ሳይሆን ለዓለም አቀፍ የአየር ንብረት ለውጥ የመፍትሔ አካል አድርጎ በማሳየት ረገድ ግንባር ቀደም ሀገር አድርጎ ያስቀምጣታል፡፡
ኢትዮጵያ የኮፕ32 ጉባኤ አስተናጋጅ ሀገር ሆና እንድትመረጥ ካደረጓት መካከል በጠቅላይ ሚኒስትር ዐቢይ አሕመድ (ዶ/ር)፣ አነሳሽነት የተጀመረውና ባለፉት ሰባት ዓመታት ከ48 ቢሊዮን በላይ ችግኞች እንዲተክሉ ያደረገው አረንጓዴ ዐሻራ መረሃግብር ሲሆን፣ ይህም ኢትዮጵያ በአረንጓዴ ልማት ዘርፍ ላስመዘገበቻቸው ስኬቶች ከዓለም አቀፉ ማህበረሰብ የተሰጠ ዕውቅናም ጭምር ነዉ፡፡
በአረንጓዴ ዐሻራ መረሀ ግብር የተከናወነው የተቀናጀና ያልተቋረጠ ጥረት የሀገሪቱ የደን መልሶ ማልማት ሥራዎች እንዲሻሻል፤ የብዝሃ ሕይወት እንዲጠበቅ እና የካርቦን ልቀት እንዲቀንስ ከፍተኛ አስተዋጽኦ አበርክቷል፡፡ የሃገራችን የደን ሽፋንም ከ17 በመቶ ወደ 23 በመቶ ማደግ ችሏል። ይህ ደግሞ ኢትዮጵያ የጀመረቸውን ለአየር ንብረት ለውጥ የማይበገር ኢኮኖሚ የመገንባት ሂደት በከፍተኛ ደረጃ የሚያጠናክር ነዉ፡፡
ኢትዮጵያ ከደን መልሶ ማልማት ባሻገር፣ የአየር ንብረት አጀንዳ በታዳሽ ኃይል ላይ የተመሰረተ ሲሆን፣ ሰፊ የውሃ ኃይል፣ የንፋስ እና የፀሐይ ኃይል አቅም በመጠቀም ብሔራዊ የአየር ንብረት መቋቋሚያ ስልት እየተከተለች ትገኛለች፡፡
ኢትዮጵያ የኮፕ32 ጉባዔን በማስተናገድ የአካባቢ ጥበቃን ከዘላቂ ልማት ግቦች ጋር ለማዋሃድ ያላትን ቁርጠኝነት አጉልቶ የሚያሳይ በመሆኑ ለዓለም ሞዴል ስራዎችን በማቅረብ ኢኮኖሚያዊና ዲፕሎማሲያዊ ጥቅሞችን እንድታገኝ ያደርጋታል ሲል የመንግስት ኮሙኒኬሽን አገልግሎት ባወጣው መግለጫ አስታውቋል፡፡
