AMN PLUS- Mudde 16/2018
Sirna ciisanyaafi abbaa lafaa bara mootummaa Hayilasillaasee mormuuf qabsoo barattoota keessatti hirmaannaa guddaa qabu, Hayyuu Maammoo Gadaa umrii isaanii guutuu mirgaaf falmachaa akka turan ibsu.
Hayyuu Maammoon AMN Dijitaal waliin turtii taasisaniin, uummatni keenya lafti kan waaqaati jedhee kan amanu irra tikfatee qotatee jiraachuufi irra oolee galuu malee kan lafaa wantaan qoodanii abbaa itti horan kana akka hin beekne kaasaniiru.
Sirni ciisanyaafi abbaa lafaa kuni uummatarraan rakkoo gahuu kan himan Hayyuu Maammoo Gadaa, qabsoo warraqsa barattootaa “Lafti Qonnaan Bultootaf” jedhu san keessatti hirmaachuun qabsaa’aa akka turan dubbataniiru.
A.L.I. tti bara 1963 barataa kutaa saddeetii turan. Diddaa sirna mootummaa Hayilasillaasee mormuuf fincilanii dandirratti osoo qabsoo taasisanu qabamanii kaampii leenjii poolisii “Kibur Zabanyaa” Dabra Biraanitti ji’a lamaaf akka hidhaman himan.
Hayyuu Maammoo Gadaa Aartii sirbaatinis quuqama uummataaf qabsaa’aa akka turan kan himu hojmaata badaa sirna Hayilasillaasee akkas jechuun….
“Bakka fedhanillee deeman fagaatanitoo
Nugusaan wajjiin oolan jabaatanitoo
Gaaris uffatanii waan fedhan nyaatanitoo
Homaa kuni hundumtuu namaa hin guutu gatiidhaa
Yoo lammiin ofii taate namaa gadiidhaa
Muknuu hin buufatu erga hundeen buqqaatee
Namnis adda isaa maal godha yoo jabaatee
Anas tana malee maaltu garaa na nyaatee
Guddadhus wajjumaan aadaa tantoo harkisee
Tokkichi adda isaa echa gahaa bultiin itti tolee
Fuulli yoo calalaaqee qufees yoo machaa’ee
Hagam miidhaga yoo duubni dalachaa’ee” jedhanii aartii sirban qeeqaa akka tura eeran.
Sirni Hayilasillaasee kufee Dargiin dhufes gaaffii lafaa malee kan diimokiraasii waan hin deebisinif qabsaa’uu akka itti fufe dubbata Hayyuu Maammoo Gadaa.
Sirni Dargii warra fincilee barbaadee akka malee lubbuu isaanii gaga’aa akka ture kan ibsan Hayyuun kun, isaa mana barumsaa biiroo keessa taa’ee hojjeta jiru itti dhufuun yoo qabuf jedhanitti foddaa duubatiin bahanii miliquun lubbuu isaanii akka olfatan dubbatan.
“Osoo guyyaa san na qabatanii, na ajjeesu ture, gaafa waaqaatan oole” jechuun mararteen dubbata.
Qabsoo isaanii kan addaan hin kutin sirna Dargiillee aartii sirbaatiin akkas jechuun qeequ..
“Ani waanuma jirutu malee wallaalee
Hojii ilma namaa keechattuu maaltu caalee
Yoo agarru kinoo yaadni hundaa addaanii
Namumti kuni yoo maal hojjetee shaggeenii
Qotus na danda’aa haamus na beeka harkii
Waanuma hundarraa rorrootu ulfaata nattii
Ba’aa rorroodha dhiirri akkam gooteti baattii
Lubbuu hamma qilleensaa hin geenye yoo yaadani
Maal qaba osoo rorrifamuu baatanii” edhee sirna Dargii Aartii sirbaatiin akka qeeqaa ture ibseera.
Sirni Dargii kufee akkumaa mootummaan TPLF dhufeen isaanis akkuma Oromoon baay’een yeroo san ABO faana hiriiree qe’ee dhaloota isaanii Boosatitti waraana ijaarrachuun qabsoo akka itti fufan dubbatu.
“Yeroo san basaasan seelii diinaa biyya hin seenne, waraanni TPLF intala dubraa xiqqoo takkan loltoota ABO nutti agarsiisi jedhanii osoo oofanu namni wa’ii gidduutti itti dhufnaan osoo isaa hasoofsisanu intanti xiqquma irraa siqxee eeruu nuf kennite, akka nuti iddoo qabnu kan nu gargaarte” guyyaa san injifannoon galuu isaanii dubbatu.
Qabsoon ABO yeroo sanii laafnan lubbuu isaanii oolfachuuf Boosat keessa miliqaa jiraachaa akka turan manguddoon kuni kaasaniiru. Boosatitti adamsuu itti hammaannan garaa Finfinnee galuu kan himan guyyaa tokko garuu namni Boosatitti isaan beeku akka isaan qabsiise dubbatan.
“Qorannoof na waamanii osoon hula balbalaa dura taa’uu roobni cimaan tokkoo roobnan, carraa san fayyadamee waaqnis na gargaare mana hidhaa sanii miliqeera” jedhu Hayyuu Maammoo Gadaa.
Qabsoo waraana dhiisuunis karaa nagaatiin qabsaa’uuf A.L.I tti filannoo bara 1997 irratti hirmaachuun lafa itti dorgomaan Aanaa Boosatiifi Fantaalletti sagalee caalmaa argachuun Parlaamaa seenanii waggoota shaniif tajaajilaa akka turanis ibsaniiru.
Sirna mootummaa dhufaa dabraa waliin qabsoo kan taasisan hayyuu Maammoo Gadaa bara mootummaa TPLF illee qabsoo aartii sirbaatiin kan qeeqaa turan waan raagan fakkaatu
Sirbi kunis…
“Bona duubni gannaa dukkana boodan ifa taatii
Wanni hunduu ni dabraa yoom akka taa’etti haafatii
Ni cima dukkannii yoo barii jala dhiyaatee
Booda deechi ilmaa haadha cinintiin itti hammaatee
Sabnillee waa qaba rorroon yoo itti hammaatee
Oromoo jilchinee cunqursaan kana duraatuu
Mangistuufuu toollee “gooliin qayyii shibbiriituu”
Itti rorriiftanii hagam bituu hiddan humnaanii
Nagaan oolee gala maal godhaa jettan biyyaanii
Hanga dhiiban qabaa hanga dhiisan qaba utubaanuu
Bokookeetoo citnaan biyya galaafata du’anuu
Yoo tuffee butanii hin basin afuura giddumaanii
Hechoon raasanilleen namatti dhoti guddumaanii
Dadhabaa se’inaa sabni mataa gadi qabannaanii
Sareenuu qirransaa gara itti dheechitu dhabnaanii
Itti baacuu gamnii ka’u galaanaa nama nyaata uummatni”
Jechuun sirbuun akkuma waan raagan fincilli qabsoo uummataa bulchiinsa mootummaa TPLF aangorraa akka buusee jijjiiramni amma dhufe kuni ragaadha.
Ammallee hayyuun kuni Faawundeeshinii “Faanaa Haqaa Maammoo Gadaa” jedhu hundeessuun haqa irratti umri manguddummaa qabaniin waa’ee dhugaa barsiisaa akka jiranis ibsaniiru.
Shuumii Badhaasootiin qindaa’e
