Irreecha yoo deeman yeroo hundaa coqorsa/marga jiidhaafi ilillii harkatti qabachuun waan amaleeffatame. Garuu marga akkamiiti?
“Coqorsi jiidhan qabannee Malkaa buunu, kan qara qabu fiixeen isaa kan hin citin ta’u qaba” jedhu Miseensi Gadaa Roobalee Hayyuu Alamuu Daadhii.
Hayyuu Alamuu Daadhii AMN PLUStti akka himanitti margii jiidhaan xiqqaa guddisi, araara fidi, nu margarsi dhaamsa jedhu mul’isa jedhan.
Ililliin keelloon immoo firii godhachuun dura kan daraaru, nu daraarii firii nu fidii nu horsiisi kan jedhu yoo mul’isu guddina, jaalala, kabajaafi tokkummaas ni agarsiisa jedhan.
Gara malkaattis yoo deeman tartiiba kan qabu ijoollee fuudhaafi heeruma hi gahinitu ilma xiqqaa mica dabballeefi intala qarreetu fuuldura deema. Cinaa mirgaatiin Abbootii gadaa yoo deeman gara bitaatiin haadholii siiqqeetu adeema.
Lafa ulfoo malkaatti yoo deeman waan ulfoo ta’an kallachaaf caaccuu qabatani dhaqu jedhan Hayyuun Alamuu Daadhii. Kallacha Abbootii Gadaatu baata. Caaccoo ammoo haadha siiqqeetu qabata jedhan.
Malkaas yoo gahan irreeffachuun dura ni eebbifatu. Eebbi kunis tartiiba qaba jedhan Hayyuu Alamuun.
Jalqaba abbaa malkaatu eebbisa. Abbaan malkaas gosa naannoo san jiraatu warra hangafaa keessaa akka eebbisu dubbatan. Itti aanee Gadaa jiituutu eebbisa jechuunis warra gadaa harkaa qabu jechuudha.
Akkas jechuunis eebbifatu…
”Waaqa uumaa
Waaqa uumamaa
Waaqa malkaa uumte
Waaqa tulluu uumte
Halkan nagaa nagaan nu bulchitee
Guyyaas nagaan nu oolchi
Biyya teenya biyya nagaa godhi
Biyya araara godhi
Biyya tokkummaa nuuf godhi
Kan baranan nuu geeche
Bara gareenis nu gahi
Booruu gannaa nu ceesistee
Taliila birratti nu baastee
Xiqqaa keenya nu guddisi
Guddaa keenya nu bulchi…. jechun eebbifatu.
Booruun gannaas calalee bishaan taliilarratti waaqaaf galata dhiyeessu. Irreechi guddaan Oromoo akka waligalatti kabajuu kan Hora Finfinnee fi Bishooftuus galateeffannaa waaqaatif yoo ta’u tokkummaa ummataa daran kan cimseedha.
Shuumii Badhaasootiin
