Daawwannaan Veeytinaam Muummichi Ministiraa Dr. Abiy Ahimad, dhageetii Itoophiyaa Sadarkaa Idil Addunyaatti kan guddisee fi hariiroo kan uumee tahuu Ripaabilika Kooriyaatti Ambaasaaddarri Itiyoophiyaa Dasee Daalkee ibsan.
Ripaabilika kooriyaatti Ambaasaaddar Dasee Daalkee daawwannaa Muumicha Ministiraa Dr.Abiy Ahimad ilaalchisee ibsa kennaniiru.
Ibsa isaaniin, Itoophiyaa fi Veeytinaam gidduutti hariiroon dippiloomasii idilee kan eegalame bara 1976 ta’uu ibsaniiru.
Veeytinaam akkuma Itoophiyaa hariiroo qajeeltoo irratti hundaa’e biyya hordoftu ta’uu ibsuun, jijjiirama qilleensaa fi dhimmoota naannoo irratti ejjennoo wal fakkaataa qabaachuu isanii himaniiru.
Muummichi Ministiraa fi Jilli isaanii turtii Veeytinaamiitiin hoggantoota biyyoota garaagaraa waliin marii gaggeessuu isaanii ibsanii, marii isaaniin dhimmoota gar-lamee fi Idil Addunyaa irratti waliin hojjechuuf carraa kan bane ta’uu eeraniiru.
Itoophiyaa fi veeytinaam dhimmoota Idi Adunyaa fi hariiroo gam-lamee irratti tumsaan waliin hojjechuuf kan isaan dandeessisu irratti marii taassisuu isanii ibsaniiru.
Itoophiyaan Afriikaa irratti, Veeytinaam immoo Eeshiyaatti dinagdee guddaa biyyoota uumaa jiran ta’uu isaanii ibsuun, kunis biyyoonni lameen muuxannoo akka waliif qoodan kan isaan taassisu ta’uu eeraniiru.
Veeytinaam industirii omishaa huccuu, gogaa fi bu’aawwan gogaa, akkasumas, kuduraa fi muduraa gabaa biyya Alaatiif kan dhiheessitu ta’uu muuxannoo kan walirraa qooddachuu danda’anidha jedhaniiru.
Veeytinaam misooma bunaan addunyaa irraatii sadarkaa lammaffaa Itoophiyaan immo Sadarkaa sadaffaa ta’uu isanii ibsuun, muuxannoo wal-jijjiiruuf walii galteerra ga’uusaanii ibsaniiru.
Waliigalticha irratti Ministironni Dhimma Alaa, adeemsa raawwii isaanii qama hordofu moggaasuuf mari’achuu isanii Ambasadar Daseen ibsaniiru.
Veeytinaam fi Itoophiyaan gara Afriikaa fi Eeshiyaatti seensa balbalaa fi riqicha ce’umsaa ta’anii akka tajaajilan ibsuun, kunis faayidaa biyyoota lamaanii irra kan darbu ta’uu dubbachuu isaanii TOI irraa odeeffanne.
