Dubbi himaan garee hidhattoota Hamaas Abu Obayidaa haleellaa Israa’eeliin ajjeefamuun isaa beekameera.
Abu Abayidaan qondaaltota olaanoo Hamaas keessaa keessaa isa tokko yommuu ta’u haleellaa Israa’el kanaan ajjeefamuun isaa mirkanaa’eera.
Ministirri Ittisaa Israa’el Israa’el Kaatz, haleellaa xiyyaaraa Al-Rimaalitti gaggeeffameen dubbi himaa kanaan alatti qondaaltonni olaanoo Hamaas eenyummaan isaanii hin beekamne du’uu akka hin oolle fuula X (Twitter duraanii) isaaniirratti ibsaniiru.
Haleellaa xiyyaaraa kaleessaa raawwatameen ajjeefamuu kan himame Abu Obayidaa hoggantoota Hamaas muraasa Onkoloolessa 7 dura lubbuun jiran keessaa tokko ture.
Dubbi himaan kun sagalee Hamaas ta’uun waraana duraa fi yeroo waraanaa Birgeedii Al-Qasim, kutaa waraanaa Hamas ta’eef ololaafi ergaa adda addaa dabarsaa ture.
Dubbi himaan kun ergaa Jimaata darbe dabarsee tureen Israa’el haleellaa magaalaa Gaazaa irratti raawwattu hin dhaabdu taanaan lubbuun lammiilee Israa’el ugguramanii balaadhaaf saaxilama jechuun akeekkachiisee ture.
Hamaas du’a dubbi himaa kanaa ilaalchisee haga ammaatti waan jedhe hin qabu.
Israa’el waraanni Gaazaa erga jalqabee booda hoggantoota waraanaa fi siyaasaa olaanoo Hamaas irratti xiyyeeffachuun haleellaa raawwachuu ishee BBC’n gabaaseera.
