Magaalaa Finfinneetti konkolaattonni tajaajila geejjiba ummataa kennan bara 2018 irraa eegalee sirna kaffaltii dijitaalaa akka eegalan Biiroon Geejjibaa Finfinnee beeksise.
Finfinnee magaalaa ismaartii taate ijaaruun tajaajila waraqaa irraa bilisa ta’e kennuuf sochiiwwan gara garaa taasifamaa jira.
Itti gaafatamaa Itti Aanaan damee Oppireeshinii Biiroo Geejibaa Finfinnee Obbo Daanyaachaw Shifarraa tajaajila geejjibaa magaalaa guddoo biyyattii ammayyeessuuf hojjetamaa akka jiru dubbataniiru.
Hojiin sirna geejjibaa teeknooloojiin ammayyeessuun Dhaabbata Veloosiitii fi atoobisoota magaalaatiin eegalamuu isaa biirichi hubachiiseera.
Dhaabbileen kunneen filannoowwan dijitaalaa adda addaatiin tajaajila kennaa akka jiran ibsaniiru.
Bara 2018 irraa eegalee konkolaattonni magaalaa Finfinnee keessatti tajaajila geejjibaa ummataa kennan harki caalaan isaanii, atoobisoota magaalaa dabalatee gara kaffaltii dijitaalaatti akka cehan ni taasifama jedhan.
Jiraattonni magaalaa tokko tokko, kaardii ismaartii fayyadamuun yeroo isaanii qusachuu irra darbee kaffaltii ji’atti waan raawwataniif baasii isaanii to’achuuf kan isaan dandeessise tahuu isaa dubbachuu Tajaajila Oduu Itoophiyaa’tu gabaase.
