Hidhi Guddichi Haaromsa Itoophiyaa biyyoon akka hin guutamne hojiin kunuunsa qabeenya uumamaa hojjatameera jedhan Ministirri Bishaaniifi Inarjii Doktar Injinar Habtaamuu Ittafaa.
Asxaafi mallattoo tokkummaa saboota, sablammootaafi Uummattoota Itoophiyaa kan ta’e Hidhi Guddichi Haaromsa Itoophiyaa eebbaaf qophaa’ee jala bultiirratti argama.
Dooktar Injinar Habtaamuu Ittafaa AMN PLUS waliin addatti turtii taasisaniin, Hidhi Guddichi Haaromsa Itoophiyaa, annisaa maddisiisun rakkoo haadholii furuun dabalata piroojektii bu’aalee hedduu kennuu danda’uudha jedhan.
Piroojektichi lammiileen Itoophiyaa waloon yoo dhaabbatan misooma kamuu milkeessuu, rakkoo kamuu qolachuu akka danda’an kan agarsiisee ta’uus ibsan.
Caalmatti anniisaa maddisiisun dhamaatiifi ba’aa haadholii kan furu ta’uu kan himan Doktar Injinar Habtaamuun, madda Carraa hojii lammileetis jedhan Hidhichi biyyoon akka hin guutamne hojiin Kunuunsa qabeenya uumamaa kan hojjatame ta’uus kaasan.
Misoomni Ashaaraa Magariisaafi sululaa hojjataman agarsiiftuu ta’uu kan ibsan Doktar Injinar Habtaamuun, naannawaan hidhichaa qulqulluufi hawwata turizimiitif akka oolu labsiin Mana Maree Bakka Bu’oota Uummataan raggaa’us Doktar Injinar Habtaamuun eeraniiru.
Hidhichi biyyootni yaa’a gadii balaa lolaatif akka hin saaxilamne taasisuun kan fayyadudha jedhan.
Hidhi Guddichi Haaromsa Itoophiyaa piroojektii dafqa, imimmaaniifi aarsaa lammiilee Itoophiyaan kan milkaa’e ta’uus Ministirri Ministeera Bishaaniifi Inarjii Doktar Injinar Habtaamuu Ittafaa himaniiru.
Guddataa Ajjamaatu gabaase
