Ameerikaan boombii atoomikaatiin Jaappaan magaalaa Hirooshimaa erga haleeltee waggaa 80 guuteera.
Haleellaan kun Bara 1945 ALAtti, baatii Hagayyaa keessa kan raawwatame tahuu ni yaadatama.
Wggaan 80’ffaa isaas Kibxata kaleessaa Jaappaan keessatti yaadatamee ooleera.
Ministiri Muummee Jaappaan Shigeru Ishiba kaleessa qondaaltota addunyaa fi kantiibaa magaalaa Hirooshimaa Kazumi Matsui waliin sirna yaadannoon kana irratti argamaniiru.
Matsui ibsa kennaniin tattaaffiin meeshaalaa waraanaa niwukilaraa ittisa biyyaatiif jedhuun baballisuuf taasisamu balaa seenaa irraa barachuu dhabuudha jechuun dubbatan.
Waraanni Addunyaa Lammaffaan Hirooshimaa fi Nagaasaakiin erga boombiin haleelalamanii harka kennachuu Jaappaaniin xumurame.
Boombiin kun namoota kuma 200 ol kan galaafate yoo ta’u, kaan dhohinsa battalaa mudateen, kaan ammoo dhukkuba raadiyeeshiniifi gubachuu irraan kan ka’e tahuu ni yaadatama.
Hambaan meeshaa waraanaa yeroo sanaa har’as namoota lubbuun hafanirratti dhiibbaa geessisuu isaa itti fufeera.
Shingo Naito, haleellaa Hirooshimaa irraa lubbuun oolee aartiitti dhimma bahuun seenaa isaa barattootaaf qooduurratti argama.
Haleellaan kun yoo raawwatamu daa’ima waggaa jahaa ta’uu, abbaafi obboloota isaa haleellaa kanaan dhabuu yaadateera
Bara 2024tti gareen Jaappaan boombii atoomikaa irraa oole Nihon Hidankyo jedhamu addunyaa kana meeshaa niwukilaraa irraa bilisa gochuuf carraaqqii taasiseen badhaasa Noobeelii nagaa injifateera.
Kantiibaan Hirooshimaa Matsui Jaappaan Waliigaltee Dhorka Gabbisa Meeshaa Niwukilaraa kan bara 2021 hojiirra oole akka raggaasistu gaafachuu isaanii BBC’n gabaaseera.
Malkaamuu Abbabaatiin
