Komishinariin Jeneraalaa Poolisii Federaalaa Dammallaash G/Mikaa’eliin kan hoogganamu gareen jila Poolisii Federaalaa, Afiriikaa Kibbaa magaalaa Keeptaawoonitti Yaa’ii Interpool Naannawa Afriikaa irratti hirmaataa jira.
Konfiraansicha irratti Itoophiyaa dabalatee hooggantoonni poolisii biyyoota Afrikaa, hooggantoonni Interpoolii, anga’ootni fi poolisii waliin walitti dhiyeenyaan kan hojjetan dhaabbileen Idil-addunyaa hirmaachuu irratti argamu.
Konfiransicha irratti haasaa saaqiinsaa kan taasisan, Pirofeesar Kaachaaliyaa Ministeera dursaa Poolisii Afiriikaa kibbaa yoo ta’an biyyoonni miseensichaa Afiriikaa fi Addunyaa irratti nagaa buusuuf qindoominaan hojjechaa akka jiran ajaa’ibsiifatanii biyyi isaanii Afiriikaan Kibbas biyyoota kana waliin hojjechuu kan itti fuftu ta’uu ibsaniiru.
Konfiransichaan tasgabbii daangaa cimsuuf wal-jijjiirraa odeeffannoo wayitawaa guddisuu fi kanneen shororkeessummaa maallaqaan deggeran to’achuuf dandeettii dhaabbatummaa fooyyessuuf adeemsa wal-jijjiirras odeeffannoo poolisii cimsuu fi waliinga’iinsa saaphana odeeffannoo ballisuu irratti hojiin hojjetame ba’eessa ta’uu himaniiru.
Komishiinar Jeneraalaa Dammallaash Gabra Mikaa’el konfiransicha cinatti prezidaantii Poolisii Idil-addunyaa Ahimad Naasir al-raayis (Dr) fi barreessaa olaanaa Vaaldes Urkizaa waliin Afriipool, Afiriikaa kibbaa , Naayijeeriyaa, Keeniyaa, Biraaziil, Ingliziitti hooggantoota Eejensii Ittisa Yakkaa Biyyaalessaa fi hooggantoota poolisii biyyoota garaagaraa waliin fi dhaabbilee Idil-addunyaa waliin marii gar-lachuu gochuu isaanii poolisiin federaalaa AMN tti xalayaa ergeen beeksiseera.
Maricha irratti koolleejiin poolisii Itoophiyaa dhaabbilee biyyoota miseensa waliin walitti dhiyeenyaan yakkoota daangaa ce’an keessumaa yakkoota shororkeessummaa maallaqaa, saayibarii, kemikaalaa fi carallaa waliin ittisuuf walii galaniiru.
Poolisiin federaalaa Itophiyaas yaa’ii Interpoolii 2027 qopheessuuf qaama ilaallaatu waliin marii gochuun akka qopheessituuf murtoon darbeera.
