Kaabineen nageenyaa Israa’el karoora magaalaa Gaazaa to’achuuf qophaa’e raggaasisuu isaa waajjirri muummicha ministiraa Beeniyaamin Netaaniyaahuu beeksisuusaa BBC’n gabaaseera.
Haata’u malee, tarsiimoon haaraan kun yaada jalqabaa muummichi ministiraa Israa’el guutummaa Gaazaa dhuunfachuuf dhiyeessanirraa gadidha jedhameera.
Kanumaan Wal qabatee mormiin dhaga’amaa jiraachuutu gabaasame.
Lolli Israa’el magaalaa Gaazaa qabachuuf daangaa Paalastaayin keessatti gootu jireenya hawaasaa kan hammeesse yoo tahu namoota kuma 10’n lakkaa’aman qe’eerraa buqqisee beelaafi bakka qubsamaa dhabanii rakkacha jiraachuu beekameera.
Gargaarsi namoomaallee akka isaan bira hin geenye Israa’el dhorkaa jirti.
Haa ta’u malee qilleensarraan gargaarsi adda addaa taasisamaafii kan jiru kanallee dhaabsisuuf guutummaatti magaalaa Gaazaa to’achuuf kaabineen nageenyaa Israa’el murteesseera.
Akka qondaalli Israa’el maqaan isaanii akka eeramu hin barbaadne tokko ibsanitti ji’oota muraasa keessatti lammiileen Paalastaayin magaalaa Gaazaa keessaa baasamuun gara buufata qubattootaatti akka galaniif karoorfamuusaa quba qabaachuu beeksisaniiru.
Israa’el sababaan itti Gaazaa to’achuu barbaaddeef bakka loltoonni Haamaas itti hafan to’achuufi magaalaa guutuutti sakatta’iinsa gaggeessuuf tahuu gabaasamaa jira.
Muummeen Ministiraa Israa’el Netaaniyaahuun Gaazaa bulchuu akka hin barbaanne ibsuun itti gaafatamummaa bulchiinsaa qaama sadaffaatti akka kennan eeranii, daangaa nageenyi itti mirkanaa’e akka barbaadan ibsuusaanii Al-Jaziiraan gabaaseera.
Waraanni Israa’eliifi Gaazaa lubbuu lammiilee paalastaayin kuma 61 ol tahan galaafachuun, kanneen kuma dhibbaan lakkaa’aman qe’eesaaniirraa buqqisuun isaa ni yaadatama.
Lammiileen baatiiwwan muraasa dura nagaan bu’eera jedhanii qe’ee isaaniitti deebi’an 200 tahanis sababa beelaan du’uun isaanii darbuu gabaasameera.
Gabaasni kan Al-Jaziiraafi BBC’ti.
