AMN PLUS- Hagayya 07/2017
Obbo Siisaay Mangistuu qonnaan bulaa Magaalaa Finfinnee kutaa Magaalaa Boolee Aanaa 12 keessa jiraatanidha.Jijjiiramaan asitti carraa qonnaan bulaa magaalaaf uumameen qe’ee akaakileefi abaabileerra dhaalanirratti hojii qonnaa garaa garaa hojjataa jiru.
Kabaja namummaa isaanii eeggatanii cimanii hojjechuun isaanii ammoo ofirra darbanii namoota biroollee akka gargaaran isaan dandeessiseera.
Jjjiiramaan duraa lafni isaanii irraa fudhatamuuf shallagamee akka ture yaadatu Obbo Siisaay.
Haata’u malee, barri jijjiiramaa kun isaan dhaqqabee, lafa dhaalaan maatii isaanii irraa argatan isaaniif akka oolche AMN Digital’f himan.
Maarree obbo Sisaay lafa isaanii agabuu hin oolchine, hin bulchine. Cimanii irratti hojjatan malee.
Kunoo amma hojii qonna magaalaan jireenya badhaadhe jiraachaa jirra jedhu.
Deeggarsa mootummaarraa argataniinis qonna magaalaan horii furdisuu, horii aannanii fi lukkuu horsiisuu, kuduraafi muduraa adda addaa irratti hirmaachaa akka jiran dubbatan.
Dabataanis, midhaan garaa garaa oomishuun gabaa Finfinnee dhiyeessaa akka jiran dubbatan.
Haftee midhaanii sirnaan kuusuun nyaata looniif fayyadamuun baasii nyaata looniif baasan akka qusachuu danda’an ibsaniiru.
Dikee looniis akka xaa’oo uumamaatti gargaaramaa akka jiran obbo Siisaay AMN Digital’f eeraniiru.
Walitti hidhamiinsi gabaas gaarii waan ta’eef bu’aa looniifi midhaaniirraa galii guddaa argataa jiraachuus himu.
Bu’aa kanaanis mana daldalaa bitanii hojii daldalaa irratti hirmaachuun galii dabalataa argachaa jiru.
Obbo Siisaay, haala guddina magaalaa waliin jiruufi jireenya isaanii ammayyeessaa akka jiran itti dabaluun himaniiru.
Milkaa’ina hojii isaanii kana akka dinqisiifatan kan dubbatan ammoo ollaa qonnaan bulaa kanaa kan tahan Obbo Bayyanaa Nagaashidha.
Qonnaan bultoota akkasumas namoota Magaalaafi naannawaa magaalaa jiraataniif qonnaan bulaa fakkeenya ta’anidha jechuun AMN Digital’f himaniiru.
Shuumii Badhaasootiin qophaa’e
