Weerarri dhibee Koleeraa Sudaanitti akka mul’ate beekameera.
Weerarri kun torban tokko keessatti namoota 1200 irratti yoo mul’atu lubbuun namoota 36 darbeera. Baatii Caamsaa irraa eegalee namoonni 158 ta’an weerara kanaan du’uunis gabaafameera.
Dhukkubni koleeraa bifa haaraan Afrikaa, Sudaanitti mul’ate tatamsa’ee miidhaa akka hin fidnetti Giddugalli To’annoo Dhukkuboota Afrikaa (CDC) irratti hojjechaa jira.
Dhaabbanni Fayyaa Addunyaas CDC Afrikaa waliin ta’uun teessoo isaa Zaambiyaa Lusaakaa taasisuun hojii tumsaa eegaluun isaa beekameera.
Haata’u malee walitti bu’insi Sudaan keessaa fi bu’uuraaleen misoomaa manca’uun dhibee kana to’achuudhaaf haala rakkisaa uumera.
Akkaataa ogeeyyiin fayyaa akeekkachiisaa jiranitti, dhibee koleeraa kana ittisuuf wal’aanuun yoo danda’amellee qindoominni jabaan hin uumamu taanaan dhibeen kun babal’achuu danda’a.
Hoggantoonni damee fayyaa akka himanitti, dhiyeessiin bishaan qulqulluu, eegumsi qulqullina naannoo fi talaalliin weerara Koleeraa ittisuuf murteessaadha jechuu isaanii Africa News fi Anadolu’n gabaasaniiru
Daraartuu Tarreessaatiin
