አዲስ ሚዲያ ኔትዎርክ

በዚህ ዓመት የመኸር እርሻ ከተማዋ 19 ሺህ 360 ቶን የሰብል ምርት እንደምታገኝ ተጠቁሟል

አርሶ አደር እሸቴ ገመቹ በቦሌ ክፍለ ከተማ የወረዳ 12 ነዋሪ ናቸው፡፡ በክፍለ ከተማው ቡልቡላ አካባቢ ነዋሪ የሆኑት እኚሁ አርሶ አደር በሰብል ልማት ተሰማርተዋል፤ ጤፍና ስንዴ ማምረት ከጀምሩ ሰንበትበት ብለዋል፡፡ እርሻቸውን በሚገባ በማለስለስ፣ ዘመናዊ ግብዓት በመጠቀም እና ሰብሎችን በመስመር በመዝራት ምርታማነታቸውን ማሳደግ ችለዋል፡፡

ከስድስት ዓመት ወዲህ በተጠናከረ መንገድ የሰብል ምርት በማምረት ተጠቃሚ ከመሆን ባለፈ ምርታቸውን ለገበያ በማቅረብ ተጨማሪ ገቢ ያገኛሉ አርሶ አደር እሸቴ፡፡

በወረዳ እና በክፍለ ከተማ ደረጃ ከግብርና ልማት ባለሙያዎች በሚያገኙት ሙያዊ ድጋፍ በመታገዝ ምርታቸውን ከጊዜ ወደ ጊዜ ለመጨመር የሚጥሩት አርሶ አደር እሸቴ፣ በአሁኑ ወቅትም ለመሰብሰብ የደረሰ የሰብል ምርት አላቸው፡፡ ባለፈው ዓመት በድግግሞሽ እርሻ ስንዴ በሄክታር 35 ኩንታል ምርት አግኝተዋል፡፡ በተያዘው የምርት ዘመንም አንድ ሄክታር ስንዴ ያላቸው ሲሆን ከዚህም 41 ኩንታል ሊያገኙ እንደሚችሉ ተናግረዋል፡፡

አርሶ አደር እሸቴ በወረዳው እና በክፍለ ከተማው የከተማ ግብርና ጽህፈት ቤት የማዳበሪያ እና የምርጥ ዘር ግብዓት በግዥ እንዲፈጽሙ ትስስር እንደተደረገላቸው ይናገራሉ፡፡ በአካባቢው የስንዴ እና የጤፍ ማሳ በክላስተር እንደዘሩ አርሶ አደር እሸቴ ገልጸው፣ ሌሎች አርሶ አደሮችም በአግባቡ የግብርና ስራቸውን ሰርተው የተሻለ ምርት እንዲያገኙ ተሞክሮአቸውን እያካፈሉ ነው፡፡

በተመሳሳይም አርሶ አደር ታቦር ከበበም በአካባቢው የግብርና ስራ የሚሰሩ ግለሰብ ናቸው፡፡ ከልጅነታቸው ጀምሮ ከአባታቸው ጋር ሆነው የእርሻ ስራን ይሰሩ እንደነበር ገልጸው፣ ዘርፉ  የሚወዱት እና የሚተዳደሩበት የስራ መስክ መሆኑን ያስረዳሉ፡፡

ጤፍ እና ስንዴ በመስመር በመዝራት እንዲሁም የግብርና ግብዓትን በአግባቡ በመጠቀም ምርታማነትን መጨመር ችለዋል፡፡ የከተማ ግብርና ስራቸውን በተቀናጀ እና በተጠናከረ መንገድ መስራት የጀመሩት ከ2013 ዓ.ም ጀምሮ ሲሆን የተደላደለ ኑሮም መስርተዋል፡፡

አስር ሄክታር መሬት ያላቸው አቶ ታቦር እና ቤተሰቦቹ ከማዳበሪያ ግብዓት ጀምሮ የምርጥ ዘር አቅርቦት ድጋፍ ያገኛሉ። ዘንድሮም፣ ስንዴ፣ ጤፍ፣ ሽንብራ እና ጓያ ዘርተዋል፤ ለመሰብሰብም በዝግጅት ላይ ይገኛሉ፡፡

ባለፈው ዓመት በሁሉም የሰብል አይነቶችም ከተሸፈነው 10 ሄክታር መሬት ከ100 ኩንታል በላይ የተለያየ የሰብል ምርት ማግኘታቸውን የጠቆሙት እኒህ አርሶ አደር፣ በዚህ ዓመትም ከስምንት ሄክታር ጤፍ ከ170 ኩንታል በላይ ምርት እንዲሁም ከሶስት ሄክታር ስንዴ ደግሞ ከ120 ኩንታል በላይ የስንዴ ምርት እንደሚያገኙ ይገልጻሉ፡፡

በቦሌ ክፍለ ከተማ የወረዳ 12 የአርሶ አደርና የከተማ ግብርና ልማት ጽህፈት ቤት የሰብል ልማት ባለሙያ አቶ መስፍን ለበታ በወረዳው 989 ነጥብ 5 ሄክታር የእርሻ መሬት ጥቅም ላይ እንደዋለ ጠቁመው፣ ከዚህ ውስጥ 133 ነጥብ 5 ሄክታር በስንዴ እንዲሁም 625 ሄክታር በጤፍ ሰብል በክላስተር የተሸፈነ መሆኑን ይገልጻሉ፡፡ ቀሪው መሬት ደግሞ በሽንብራ እና ጓያ ሰብል የተሸፈነ መሆኑን አንስተዋል፡፡

አቶ መስፍን በወረዳው ለአርሶ አደሮቹ ከእርሻ ስራ ጀምሮ የኤክስቴንሽን ሙያዊ ድጋፍ እንደሚያደርጉ እና 23 ነጥብ 5 ኩንታል ምርጥ ዘር እና 1 ሺህ 900 ኩንታል ማዳበሪያ መሰራጨቱን ገልፀዋል፡፡

በቦሌ ክፍለ ከተማ የአርሶ አደርና የከተማ ግብርና ልማት ጽህፈት ቤት የሰብል ልማት ባለሙያ አቶ ይበልጣል ሙላት በክፍለ ከተማው ወረዳ 11 እና ወረዳ 12 የመኸር ሰብል ልማት ስራ እየተሰራ መሆኑን ጠቁመው፣ በጥቅሉ 1 ሺህ 313 አርሶ አደሮች ተሳታፊ መሆናቸውን ገልፀዋል፡፡

ባለፈው ዓመት በቴክኖሎጂ በመጠቀም በመስመር እና በብተና 320 ሄክታር ስንዴ የተዘራ ሲሆን፣ በብተና ከተዘራው በሄክታር 35 ኩንታል ምርት ማግኘት ተችሏል፡፡ በባለሙያ ድጋፍ በቴክኖሎጂ በመስመር የተዘራው ደግሞ በሄክታር እስከ 41 ኩንታል የስንዴ ምርት ተገኝቷል፡፡

ጤፍም በመስመር እና በብተና የተዘራ ሲሆን፣ በብተና በሄክታር 18 ኩንታል ምርት የተገኘ ሲሆን፣ በመስመር በተዘራው ደግሞ በሄክታር 22 ኩንታል መገኘቱን አቶ ይበልጣል ይናገራሉ፡፡

በዚህ ዓመት በክፍለ ከተማው 1 ሺህ 210 ሄክታር መሬት በጤፍ እና በስንዴ ሰብል ተሸፍኗል፡፡ በዚህም 75 አርሶ አደሮች ተሳትፈዋል፡፡ የምርጥ ዘር እና የአፈር ማዳበሪያ ግብዓት እና የእርሻ ትራክተር እንዲሁም የቅርብ ድጋፍና ክትትል  እንደተደረገ የሰብል ባለሙያው ያስረዳሉ፡፡

በዚህ ዓመት በቁም የሰብል ትመና መሰረት በቴክኖሎጂ ድጋፍ በመስመር ከተዘራው ስንዴ በሄክታር እስከ 41 ኩንታል ምርት ይገኛል ተብሎ ይጠበቃል፡፡ በጤፍ ደግሞ እስከ 22 ኩንታል በሄክታር ምርት ለማግኘት ታቅዷል፡፡

በአቃቂ ቃሊቲ ክፍለ ከተማ የአርሶ አደርና የከተማ ግብርና ልማት ጽህፈት ቤት የእጽዋት ልማት ቡድን መሪ አቶ ጉደታ ሽብሩ በክፍለ ከተማው 1 ሺህ 90 ሄክታር መሬት በሰብል መሸፈኑን ጠቁመው፣ በዚህም 563 አርሶ አደሮች ተሳትፈዋል፡፡ መሬቱም በጤፍ፣ በስንዴ፣ ሽንብራ፣ ጓያ፣ ምስር የተሸፈነ መሆኑን ይገልጻሉ፡፡ በክፍለ ከተማው በዚህ ዓመት በቅድመ ምርት ትንበያ 24 ሺህ 690 ኩንታል ምርት ለማግኘት መታቀዱን ተናግረዋል፡፡

የአፈር ማዳበሪያ እና ምርጥ ዘር በግዥ እንዲፈጽሙ ትስስር ማድረግ፣ የሙያ ድጋፍ መስጠት፣ ቴክኖሎጂዎችን በአግባቡ እንዲጠቀሙ እና ከአስተራረስ ጀምሮ ዘር እንዴት መዝራት እንዳለባቸው የሙያ ድጋፍ እንደሚሰጡ አቶ ጉደታ ይገልጻሉ፡፡

በአርሶ አደርና የከተማ ግብርና ልማት ኮሚሽን የሰብል ልማት ባለሙያ አቶ ተስፋዬ ኪዳነማርያም በዘርፉ ዘመናዊ የአሠራር፣ አመራረት ዘዴና ቴክኖሎጂዎችን በመጠቀም በግልና በተደራጀ መንገድ በመሥራት የዘርፉ ተጠቃሚዎች ስለከተማ ግብርና ያላቸውን ግንዛቤ በማስፋት በትኩረት እየሰራ ነው ብለዋል፡፡

በየካ፣ ቦሌ፣ ለሚ ኩራ፣ አቃቂ ቃሊቲ፣ ንፋስ ስልክ ላፍቶ፣ ኮልፌ ቀራንዮ ክፍለ ከተሞች በሚገኙ ስድስት የማስፋፊያ ቦታዎች በመኸር ሰብል 7 ሺህ 165 ሄክታር መሬት በዘር የተሸፈነ ሲሆን፣ 5 ሺህ 280 አርሶ አደሮች ደግሞ ተሳታፊ ሆነዋል፡፡ 15 ሺህ 507 ኩንታል  ማዳበሪያ  እና  1 ሺህ 541 ኩንታል  ምርጥ ዘር  ግብዓት ደግሞ ጥቅም  ላይ የዋለ ሲሆን፣ በዚህም በቅድመ ምርት ትመና 19 ሺህ 360 ቶን ምርት ይገኛል ተብሎ እንደሚጠበቅ አቶ ተስፋዬ ይገልጻሉ፡፡

እንደ ባለሙያው ገለጻ 513 አርሶ አደሮች በተፈጠረላቸው ግንዛቤ እና በተሰጣቸው ሙያዊ ስልጠናና የኤክስቴንሽን ምክር አገልግሎት ትራክተር በመጠቀም የኩታ ገጠም እርሻ ተግባራዊ በማድረግ በመስመር መዝራት ተችሏል፡፡

የክፍለ ከተማ፣ የወረዳ አመራሮች እና ባለሙያዎች የሰብል ምርትና ምርታማነትን ለማሳደግ አርሶ አደሮችን በማሳመን ባላቸው የአካባቢ ማቴሪያል እና አዳዲስ ቴክኖሎጂዎችን በመጠቀም ሰብልን በመስመር እንዲዘሩ ሙያዊ ድጋፍ የተሰጠ መሆኑን አቶ ተስፋዬ ይጠቁማሉ፡፡

በከተማዋ ምርትና ምርታማነትን ለማሳደግ ያለውን የአካባቢን ፀጋ በመጠቀም በአንዳንድ የመንግስት መስሪያ ቤቶች ግቢ ውስጥ የነበረ አምና ያልታረሰ ክፍት ቦታ ዘንድሮ በማረስ  በሰብል መሸፈኑን ይገልጻሉ፡፡

አቶ ተስፋዬ የከተማ ግብርና ልማት ምርትና ምርታማነትን በመጠንና በጥራት በማሳደግ የኑሮ ውድነቱን ማቃለል፣ የከተማ ነዋሪዎችን ከተረጂነት ወደ አምራችነት እንዲሸጋገሩ ማድረግ እና የምግብ ሉዓላዊነትን ማረጋገጥ ትኩረት በማድረግ እየተተገበረ መሆኑን ይናገራሉ።

በይግለጡ ጓዴ