Awustiraaliyaan seera addunyaa irratti yeroo jalqabaaf guddattoota miidiyaa hawaasaa akka hin fayyadamne dhorku hojiirra oolchuun ishee ibsameera.
Seerri biyyatti hojiirra oole kunis guddattoota umurii 16 gadii akka isaan miidiyaa hawaasaa hin fayyadamne kan dhorkudha jedhameera.
Seerri kunis maatii ijoolleefi dhaabbilee mirga daa’immaniif dhaabbatan biratti fudhatama yoo argatu, dhaabbilee mirga yaada ibsachuuf dhaabbataniifi dhaabbilee teekinooloojii gurguddoon qeeqamuun isaa ibsameera.
Awustiraaliyaan guyyoota muraasa darban keessa dhaabbileen miidiyaa hawaasaa gurguddoon kanneen akka TikTok, Google, Youtube fi Facebook dabalatee dhaabbileen 10 itti fayyadama teekinooloojiwwan kenneeni irratti dhorkii daa’immanii akka baasan ajaja dabarsaniiru.
Dhaabbileen kunneen seera bahe hojiirra kan hin oolchine yoo ta’e Doolaara miliyoona 33 akka adabaman ibsameera
Ministirri Muummee Awustiraaliyaa Antoonii Albaaneez guyyaan seerri kun ifoome maatii daa’immaniif ” Guyyaa Boonsaa” jedheera.
”Murtiin kun jijjiirama guddaa fida” kan jedhan Albaaneez, biyya isaanii keessatti jijjiiramoota gama hawaasaafi aadaatiin dhufan keessaa isaa tokko akka ta’e ibsa miidiyaaleef kennan dubbataniiru.
Tarkaanfiin kun sadarkaa addunyaatti osoo itti fufee fooyya’iinsa guddaa akka fidus ibsaniiru.
Ministirri Muummee Albaaneez Ijoolleen boqonnaa isaanitti ispoortii hojjachuu akka jalqaban akkasumas kitaabota barsiisoo ta’an akka dubbisan dhaamuu isaanii Rooyitarsitu gabaase.
Shuumii Badhaasootiin qindaa’e
