Har’a tolchuu fi karoora fooyya’aa borii hojiirra oolchuuf qaroomina, ammayyummaa fi seenaa sirnaan hubachuun murteessaa akka ta’e Ministirri Muummee Abiyyi Ahimad (PhD) ibsan.
Xumura leenjii hooggantoota olaanoo Paartii Badhaadhinaa irratti kan argaman Dooktar Abiyyi, mootummaan Ida’amuu hojii akkamitti raawwachuu akka qabu ifatti kaa’uu ibsaniiru.
Qajeeltoo ijoo mootummaan Ida’amuu afran “Uumuu, saffisiisuu, baay’isuufi qulqulleessuu” irratti xiyyeeffannaan akka kennamu dubbataniiru.
Waan hin uumamin qulqulleessuun akka hin danda’amne ibsuun, waan qulqullina qabuu filachuuf ammoo waan baay’ee uumuun akka barbaachisu hubachiisaniiru.
Umuu fi saffisuu gidduutti muraasni yeroo dheeraa turuu fi qulqullina isaanii eeggatanii bahuun ni gargaarus jedhaniiru.
”Baay’achuun carraa, qulqullinni garuu bu’aadha” kan jedhan Dooktar Abiyyi, qabxiilee ijoo lamaanirratti akka xiyyeeffatan akeekaniiru.
Akkaataa qaroominni, ammayyummaa, fi duubatti hafummaan itti uumame seen-duubee isaa ilaaluu fi muuxannoo irraa fudhachuu irratti kan xiyyeeffate ta’uus ibsaniiru.
Rakkoolee Itoophiyaan Baroota hedduun keessa dabarteefi duubatti hafummaa biyyatti haala idil-addunyaa wajjin walbira qabuun ibsaniiru.
Haaluma kanaan qaroomina, ammayyummaa, fi seenaa sirnaan hubachuu baannaan har’a hojjachuun waan boru yaadnu dhugoomsuun akka rakkisu dubbataniiru.
Dhimmi ijoo lammaffaan qajeelfama Ida’amuu irratti hundaa’uun biyya akkamitti uumuun akka danda’amu kaasaniiru.
Qabxiin kun yaadota ijoo afran mootummaan ida’amuu irratti xiyyeeffate: uumuu, saffisiisuu, baay’isuu, fi qulqulleessuu hojiirra oolchuudhaan Itoophiyaa qaroomtee fi ammayyoofte uumuudhaf akka gargaaru dubbataniiru.
Shuumii Badhaasootiin
