Hojjattoonnifi hooggantoonni Addis Miidiyaa Neetwoork biqiltuu Ashaaraa Magariisaa baatii Adoolessaa Bara 2017 Kutaa Magaalaa Gullalleetti dhaabanii turan kunuunsan.
Hoji Raawwachiisaan Olaanaa Addis Miidiyaa Neetwork, Obbo Kaasaahun Gonfaa, AMN akkuma qophiidhaan hojiin tokko eessa gahe jechuun hojjatu, biqiltuu dhaabnes sadarkaa isaan irratti argaman kunuunsaa jira” jedhaniiru.
Obbo Kaasaahun dabaluun, hojiin misooma magariisaa Itoophiyaatti hojjatamaa jiru akka magaalaa Finfinneettis bu’aa qabatamaa agarsiisaa jiraachuu himan.
Sadarkaan uwwisa magariisaa Finfinnees %2 irraa garaa %22tti kan guddateef hojii dhaabuufi kunuunsa qindoominaan hojjatameen ta’uu ibsaniiru.
“AMN Sagalee Dhalootaati. Biqiltuu dhaabes dhalootaaf kunuunsuun fakkeenya ta’a” jedhan.
Sagantaa Ashaaraa Magariisaa ‘Dhaabuun Bayyanachuu’ jedhuun AMN Gidduugala Biqiltuu Gullalleetti biqiltuuwwan dhaaban haalaan latuun hedduu akka isaan gammachiises ibsan.
Hojjattoottni AMN biqiltuu dhaaban kunuunsanis “Akka ilmoo keenyaatti bishaan dhugsiisnee, biyyee barbaachisu laanneefi, kun baayyee nu gammachiiseera” jechuun ibsan.
Fuulduraattis deebi’anii kan kunuunsan ta’uu waadaa seenaniiru.
Malkaamuu Abbabaatu gabaase
