Magaalaa Finfinneetti bara bajataa 2017’tti galiin birrii biiliyoona 200 fi biiliyoona 33 ol walitti qabamuu Kantiibaan Bulchiinsa Magaalaa Finfinnee Aadde Adaanech Abeebee ibsaniiru.
Bara bajataa kanatti birrii biiliyoona 200 fi biiliyoona 41 walitti qabuuf kan karoorfame yoo ta’ellee birrii biiliyoona 200 fi biiliyoona 33 ol walitti qabuun karoora qabame harka 96.5’n milkeessuun danda’ameera jedhan.
Kunis galii bara darbe walitti qabame waliin yoo madaalamu birrii biiliyoona 83.3’n caalmaa akka qabu himaniiru. Raawwiin kunis galii magaalichaarratti guddina harka 45 agarsiisuu himan. Galiin walitti hin qabamin hafe birriin biiliyoona 8 deeggarsaafi liqaarraa ni argama jedhamee bajata dabalataan kan labsame akka tures eeraniiru.
Kantiibaa Adaanech Abeebee ergaa karaa miidiyaa hawaasummaa isaaniin dabarsaniin jijjiiramniifi guddinni humna keessoon dhufu bu’uurrisaa bal’aaa, utubaan isaan cimaadha jedhan.
Bu’aa argameefis jiraattota magaalichaa, kaffaltoota gibiraa, hooggansaafi hojjettoota biiroo Galiiwwanii, qooda fudhattootaa hunda galateeffataniiru.
Guddinni Magaalaaa keenyaas aadaa hojii qindoominaafi amantaa cimaa of keessaa qabuun cimee itti fufa jedhan.
