Barnootni imala jijjiiramaa fi misoomaa Afrikaa akka qajeelchuuf kaayyoo waloo tokkoof waliin hojjechuu qabna jedhan Ministirri Muummee Itti Aanaan Obbo Tamasgeen Xurunaa.
Obbo Tamasgeen Yaa’ii Waggaa 41ffaa madaalli sirna Barnootaa Afrikaa Itoophiyaan qopheessite har’a ifatti bananiiru.
Afrikaan guddachaa jirti, garuu kun gahaa mitii egeree dursa qabachuu qabdis jedhaniiru.
Kanaaf ammoo ijoolleen Afrikaa barnoota argachuu qofa osoo hin taane, barnoota haqa qabeessa, sirrii fi qulqullina qabu akka argatan gochuu qabnas jedhaniiru.
Waltajjiin barnootaa barumsa madaaluuf qofa osoo hin taane, eessa akka jirru nutti himuu fi garam deemuu akka qabnu kan nu qajeelchu meeshaa furtuu ta’e jiraachuu akka qabu ibsaniiru.
Itoophiyaan barnootaafi sirni madaallii haqa qabeessa, hiika kan qabuu fi yaada beekumsaa qofarratti kan hundaa’e osoo hin taane ogummaa qabatamaa irratti kan xiyyeeffate akka ta’uuf hojjechaa akka jirtus akeekaniiru.
Gama hundaan Afrikaa fooyyofte ijaaruuf qulqullina barnootaaf dursa kennuu akka barbaachisu dubbataniiru.
Kanaafis tokkummaa ardiilee kan cimsu beekumsa aadaa kan kabaju, beekumsa Afrikaa horachuu kan dandeessisu sirna barnootaa fi madaallii ardiilee kan waloo uumuun akka barbaachisu eeraniiru.
