AMN PLUS – Onkololeessaa 15/2018
Fooramiin Xaanaa 11ffaan Magaalaa Finfinee Yaadannoo Injifannoo Aduwaatti har’a taa’amuu eegale.
Firamicha irratti hoggantoonni, ministeerotni haajaa alaa, bakka buutonni addaa, hayyoonnii fi qooda fudhattoonni hirmaachaa jiru.
Mariin paanaalii diinagdee, nageenyaa fi misooma hawaasummaa fi siyaasaatiin rakkoolee mudatanii fi furmaata irratti kan xiyyeeffates geggeeffameera.
Ministirri Dhimma Alaa Geediyoon Ximotewos (PhD) marii paanaalii kana irratti akka jedhanitti, Biyyoonni Afrikaa birmadummaa diinagdee isaanii ofuma isaaniitiin haala mirkaneessuuf isaan dandeessisu mijeessuu akka qaban himan.
Dargaggootaa fi dubartoonni akkasumas teknoloojiin badhaadhina dinagdee Afrikaatiif humna sochooftuu taasifamuu akka qabu himanii, ijaarsi bu’uuraalee misoomaas xiyyeeffannoo kan barbaadan ta’uu eeraniiru.
Walitti dhufeenyi biyyoota Afrikaa gama invastimantiitiin jiru cimuu akka qabus ibsaniiru.
Daandiin Qilleensaa Itiyoophiyaa biyyoota Afrikaa birootti invasti gochuun carraa hojii uumuun walitti dhufeenyi biyyoota ardichaa akka cimuuf gahee olaanaa taphachaa akka jirus ibsaniiru jechuun TOI gabaaseera.
Pirezdaantiin duraanii Mozaambiik Jo’aakiim Chisaanoo gama isaaniitiin, hariiroon biyyoota Afrikaa jiraatus walitti hidhamiinsa gahaa qabu jechuun hin danda’amu jedhan.
Hariiroon wal amantaa irratti hundaa’uu akka qabu kaasuun, dhimmoota waloo irratti walamantaa cimsuun murteessaa ta’uu xiyyeeffannoo itti kennuun dubbataniiru.
Pirezidaantiin Maalaawwii duraanii Joysee Baandaa (Dr), Afrikaan qabeenya uumamaa duroomtuu ishee taasisan qabaattus, qabeenya isheetti fayyadamuu irratti garuu muraasa ta’uu ibsaniiru.
Carraawwan jiranitti fayyadamuun dhaloota dhufuuf carraa hojii uumuun murteessaa tahuu eeruun, dubartoota hirmaachisuun ajandaa ijoo hoggantoota Afrikaa ta’uu akka qabu hubachiisaniiru.
