Hojii qindoominaa caasaa Nageenyaafi uummataan hojjetameen Magaalaa Finfinnee Magaalaa naga qabeettiifi jiruuf jireenya lammiileef mijatuu taate ijaaruun akka danda’ame Hoogganaa Itti Aanaa Biiroo Bulchiinsa Nageenyaafi Tasgabbii Magaalaa Finfinnee Obbo Miidhaksaa Kabbadaa himan.
Biiroon Bulchiinsa Nageenyaafi Tasgabbii Magaalaa Finfinnee Miseensota nagaa fi qacarrii hawaasaaf Leenjii hubannoo cimsuu kennuu eegaleera.
Nageenya Magaalaa Finfinnee waaressuun magaalattiin magaalaa lammiileen yaaddoo tokko malee keessa jiraataan taasisuuf hojii hojjetame keessatti hirmaannaan uummataa guddaa ture kan jedhan Obbo Miidhaksaan, hojii qindoominaan hojjetameen Finfinnee naga qabeettii ijaaruun danda’ameera jedhan.
Nageenya magaalattii fulla’aafi amansiisaa taasisuuf miseensonni nagaa fi qacarrii hawaasaa leenjii dandeettii raawwachiisummaa fudhatan gahee guddaa qabus jedhaniiru.
Abdiin Nageeyaafi Misoomaa Finfinneetti eegalame duubatti akka hin deebineef hirmaannaa uummataafi qooda fudhattoota biiroo cimsuun kan hojjetamu ta’uus Obbo Miidhaksaan himaniiru.
Leenjiin dandeettii raawwachiisummaa miseensota nagaafi qacarrii hawaasaaf kennamuu eegale kun har’a dabalatee guyyoota itti aanaan 12’f kan kennamu ta’uu sagantaa bahe irraa hubachuu dana’ameera.
Sisaay Dirribaatu Gabaase.
