የመደመር መንግሥት የውጭ ግንኙነት ፖሊሲውን ዋነኛ መሰረት በጎረቤት ሀገራት ላይ በማድረግ፣ በምስራቅ አፍሪካ ዘላቂ ሰላምና የኢኮኖሚ ትስስርን ለማረጋገጥ የሚያስችሉ ስትራቴጂካዊ እርምጃዎችን እየወሰደ ይገኛል። ይህ “ጎረቤት ተኮር” የዲፕሎማሲ አቅጣጫ ኢትዮጵያ ከጎረቤቶቿ ጋር ያላትን ታሪካዊ፣ ባህላዊና ተፈጥሯዊ ትስስር ወደ ላቀ የኢኮኖሚና ፖለቲካዊ አጋርነት ለመለወጥ ያለመ ነው። መንግሥት የኢትዮጵያ ሰላምና ብልፅግና ከቀጠናው ሀገራት መረጋጋት ጋር በቀጥታ የተሳሰረ በመሆኑ፣ ለብቻ የሚመጣ ዕድገት ዘላቂነት እንደሌለው በጽኑ ያምናል።
ባለፉት የለውጥ ዓመታት መንግሥት የዲፕሎማሲ ስራውን ከመደበኛ ግንኙነት ባለፈ በተጨባጭ የኢኮኖሚና ማህበራዊ ትስስር ላይ እንዲያተኩር አድርጓል። ከእነዚህም መካከል ከጅቡቲ ጋር ያለው የውሃና የኃይል ትስስር፣ ከኬንያ ጋር የተጀመሩ ግዙፍ የመሰረተ ልማት ግንባታዎች (እንደ ላሙ ወደብ ፕሮጀክት) እና የሳፋሪኮም ኢንቨስትመንት ተጠቃሽ ናቸው። በተጨማሪም ከደቡብ ሱዳን ጋር የ220 ኪሎ ሜትር ድንበር ተሻጋሪ መንገድ ግንባታ ስምምነት መፈረሙና ከሶማሊያ ጋር በፀረ-ሽብርና በወደብ ጉዳዮች ላይ የተደረሱ መግባባቶች መንግሥት ለቀጠናዊ ውህደት ያለውን ቁርጠኝነት የሚያሳዩ ናቸው።
መንግሥት በቀጠናው ሰላምን ለማስፈን በሚያደርገው ጥረት “ለአፍሪካዊ ችግሮች አፍሪካዊ መፍትሔ” የሚለውን መርህ በመከተል በሱዳን የሽግግር ወቅትና የሰላም ሂደት ላይ የመሪነት ሚና ተጫውቷል። ጦርነት ከተቀሰቀሰ በኋላም ለሱዳናውያን መጠለያ በመሆንና የ15 ሚሊዮን ዶላር ሰብአዊ ድጋፍ በማድረግ ኢትዮጵያ አለኝታነቷን አሳይታለች ። ይህ በጋራ ተጠቃሚነት ላይ የተመሰረተ ግንኙነት፣ የኢትዮጵያን የኤሌክትሪክ ኃይል ሽያጭ በማሳደግ የውጭ ምንዛሬ ከማስገኘቱም በላይ የጎረቤት ሀገራትን የኢንዱስትሪ እንቅስቃሴ በማገዝ ቀጠናዊ ትስስርን አጠናክሯል። ይህም በድንበር አካባቢ የሚኖሩ ዜጎች የንግድና ማህበራዊ መስተጋብር እንዲሻሻልና ደህንነታቸው እንዲጠበቅ ከፍተኛ አስተዋጽኦ አድርጓል።
ወደፊትም መንግሥት የኢኮኖሚ ውህደቱን ይበልጥ ለማፋጠን የባቡር፣ የመንገድና የኢነርጂ መስመሮችን በማስፋፋት የምስራቅ አፍሪካን የጋራ ገበያ እውን ለማድረግ አቅዷል። የሀገሪቱን እያደገ የመጣ የንግድ ፍላጎት ለማርካትም ከጎረቤት ሀገራት ጋር በወደብ ልማትና አጠቃቀም ላይ ፍትሃዊና የጋራ ተጠቃሚነትን ያረጋገጡ ስምምነቶችን ለመፈጸም እየሰራ ይገኛል። በተጨማሪም ያልተፈቱ የድንበር ጉዳዮችን በውይይትና በአለም አቀፍ ህግ በመፍታት፣ የድንበር አካባቢዎችን የልማትና የንግድ ማዕከል የማድረግ ራዕይ ሰንቋል።
ይህ ስትራቴጂ ኢትዮጵያ በቀጠናው የሰላም መልህቅና የንግድ መገናኛ ሆና እንድትቀጥል የሚያስችል ነው።
የመንግሥት የውጭ ግንኙነት ፖሊሲ ማዕከል የሆነው “ጎረቤት ተኮር” ስትራቴጂ የሀገርን ብሄራዊ ጥቅም ከቀጠናው የጋራ ጥቅም ጋር በማጣጣም ላይ የተመሰረተ ነው።
ይህም ቀጠናው የኃያላን ሀገራት የፍላጎት መድረክ ከመሆን ይልቅ፣ የጋራ እድገትና የተስፋ ምድር እንዲሆን ለማስቻል ነው። መንግሥት የሚገነባው ግንኙነት በጊዜያዊ ፖለቲካዊ ትርፍ ላይ ሳይሆን፣ ለቀጣዩ ትውልድ በሚተርፍ ጠንካራ የወንድማማችነት መሰረት ላይ የተጣለ በመሆኑ፣ ለኢትዮጵያና ለጠቅላላው የምስራቅ አፍሪካ ብልፅግና ዋስትና እንደሚሆን ይጠበቃል።
