Balaa lolaa biyyoota Eeshiyaa Kibbaa 4 keessatti mudateen yoo xiqqaate lubbuun namoota 1000 akka darbe ibsame.
Indooneezhiyaatti yoo xiqqaate namootni 502, Sirilaankaatti 335 , Taayilaanditti 176 fi Maaleezhiyaatti ammoo namootni 2 sababaa balaa lolaa kanaan lubbuu dhabuu isaanii ibsameera.
Balaan lolaa rooba cimaafi haala qilleensaa hamaan walmake Kuni sigiga lafaa uumuun namoota lubbuu baraaranifillee rakkoo cimaa akka uume kan gabaafame.
Pirezidaantiin Indooneezhiyaa Piraabowoo Suubiyaantoo, mootummaan gargaarsa namoomaa bakkeewwan balaa kanaaf saaxilamanitti erguuf dursa kennee akka hojjataa jiru beeksisaniiru.
Helikooftarootaan gargaarsa namoomaa bakkeewwan gar-malee miidhamaniitti erguuf tattaafataa jiraachuu kan himan Pirezidaantichi, kanneen lubbuun darban malee haga ammaatti namootni hin argamin bakka gahan kan hin beekamne hedduun akka jiran ta’uu ibsaniiru.
Indooneezhiyaan labsii yeroo balaa labsuuf akka jirtu yoo ibsamu, gargaarsa idil addunyaas gaafataniiru.
Sirilaankaan hospitaalota doonii socho’aa lamaafi dooniiwwan waraanaa sadii gara bakka balaan miidhamanitti ergitus, haalli daandii darbaaf dhorkuu jiraachuu isaa ibsameera.
Balaliisaan helikooftaraa osoo gargaarsa atattamaan qaqqabsiisaa jiruu haala gaddisiisaa ta’een lubbuu isaa kan dhabe namoota hedduu gaddisiiseera.
Pirezidaantiin Sirilaankaa Anuraa Kumaaraa Disaanaayaakeen labsii hatattamaa kan labsan yoo ta’u, balaan kun yoo darbee biyya fooyyofte ijaaruuf qophii taasisuu akka qaban beeksisan.
Gama biraan, Taayilaand qormaata balaa lolaan itti dhufe kana jalaa bahuuf qophii gahaa gochuu dhabuun wal qabatee anga’ootni lama hojii isaanii gadi lakkisuun eerameera.
Biyyootni Eeshiyaa, keessumaa waggoota muraasaa as balaa lolaafi obomboleettii hamaan raafamaa akka jiran gabaafameera.
Filippinsitti baatii darbe keessa lubbuun namoota 242 caalu sababaa kanaan darbuun isaanii ni yaadatama.
Jijjiiramni qilleensaa teempireechara dabaluun obomboleettii hamaa fi balaa lolaa hammeessuun rakkoon mudachaa jiru daran wal xaxaa taasisaa akka jiru Al-Jazeeraa’n gabaaseera.
Malkaamuu Abbabaatiin
