Dhaloota seenaa, aadaafi safuusaa beekee guddina biyyaatiif gahee isaa bahatu horachuuf hojjachaa jiraachuu Inistiitiyuutiin Qorannoofi Qo’annoo Oromoo (IQQO) beeksiseera.
Korri Dargaggoo Oromoo qindeessummaa Inistitiyuutii Qorannoofi Qo’annoo Oromoofi Biroo Dargaggoofi Ispoortii Oromiyaatiin qophaa’e mata duree “Aadaafi duudhaa keenya ganamaatti deebi’uun dhaloota safuun bulu haa ijaarru” jedhuun Yuunivarsiitii Bulee Horaatti adeemsifameera.
Daayirektarri Olaanaa Inistitiyuutii Qorannoofi Qo’annoo Oromoo Dirribaa Tarrafaa (PhD), “Mootummaan Naannoo Oromiyaa seenaa, aadaa, duudhaafi aartii Oromoo karaa saayinsawaafi guddummaa sabichaa madaaluun akka qoratamu xiyyeeffannoo kennee hojjachaa jira” jedhan
Inistitiiyuutiin Qorannoofi Qo’annoo Oromoo hanga ammaatti hojii jajjabeessaa hojjechaa tureen kitaabilee seenaafi aadaa sabichaa mul’isan afaanota adda addaatiin qoratamuun akka maxxanfaman taasisuu ibsan.
Hooggantuun Biiroo Dargaggoofi Ispoortii Oromiyaa Aadde Roozaa Biyyaa, dargaggoonni naannichaa aadaa dubbisuufi aadaa hojii guddifachuun fayyadamummaa diinagdee isaanii guddifachuu qabu jedhan.
Kantiibaan Magaalaa Bulee Horaa Obbo Waaree Gadaa gamasaaniin, akkuma dargaggoonni kaleessaa dargaggoota har’aatiif bu’uura ta’an dargaggoonni har’aas biyya isaanii jaalachuufi gahee isaanii bahuu akka qaban dhaamaniiru.
Dargaggootni aadaa hojii cimaa qabaachuu, wal qoodinsaafi jibbarraa bilisa ta’uun wal kabajuu, waldhaga’uufi muuxannoo waliif qooduun jiruufi jireenya isaanii jijjiirrachuu akka qaban dhaamaniiru.
Kora kanarratti qorannoowwan 3 hayyootaan dhiyaachuun irratti mari’atamuu odeeffannoon Komunikeeshinii Inistitiyuutichaa irraa argame ni mul’isa.
